لیہ: اسسٹنٹ کمشنر کروڑ اصغر علی چیمہ کی زیر صدارت تحصیل کروڑ اور فتح پور میں صفائی ستھرائی کے انتظامات اور ستھرا پنجاب آپریشنز کے حوالے سے اجلاس منعقد ہوا، جس میں میونسپل کمیٹی، ستھرا پنجاب عملہ، اسسٹنٹ ڈائریکٹرز لوکل گورنمنٹ اور سیکرٹریز یونین کونسلز نے شرکت کی۔ اجلاس میں دونوں علاقوں میں صفائی کے انتظامات، سالڈ ویسٹ مینجمنٹ اور فیلڈ میں جاری سرگرمیوں کی کارکردگی کا تفصیلی جائزہ لیا گیا۔ اس موقع پر اسسٹنٹ کمشنر اصغر علی چیمہ نے ہدایت کی کہ وزیراعلیٰ پنجاب مریم نواز شریف کے ویژن کے مطابق ستھرا پنجاب پروگرام کے مقررہ اہداف کا سو فیصد حصول یقینی بنایا جائے۔ شہری اور دیہی علاقوں میں صفائی کے معیار پر کوئی سمجھوتہ نہ کیا جائے۔ انہوں نے تمام متعلقہ افسران کو فیلڈ میں اپنی موجودگی یقینی بنانے، صفائی ٹیموں کی کارکردگی کی باقاعدہ نگرانی کرنے اور کوڑا کرکٹ کی بروقت منتقلی سمیت تمام سرگرمیاں مقررہ شیڈول کے مطابق مکمل کرنے کی ہدایت کی تاکہ عوام کو صاف ستھرا ماحول فراہم کیا جا سکے۔
