لَیَّہ (نمائندہ لیہ ٹی وی) لَیَّہ کے علاقے فتح پور کے قریب ایم ایم روڈ پر ٹول پلازہ کے نزدیک تیز رفتار کار ٹریلر سے ٹکرا گئی، جس کے نتیجے میں خواتین اور بچوں سمیت 7 افراد زخمی ہو گئے ریسکیو 1122 نے فوری کارروائی کرتے ہوئے زخمیوں کو طبی امداد فراہم کر دی۔ریسکیو ذرائع کے مطابق ابتدائی معلومات میں بتایا گیا ہے کہ چوک اعظم کی جانب جانے والے ٹریلر کو عقب سے آنے والی اوور اسپیڈ کار نے ٹکر مار دی، جس کے باعث شدید ٹریفک حادثہ پیش آیا۔ ریسکیو عملے کے مطابق کار کی رفتار تقریباً 100 کلومیٹر فی گھنٹہ تھی۔حادثے میں 40 سالہ محمد اعجاز، 35 سالہ شاہین، 25 سالہ امرین، 13 سالہ فرح، 22 سالہ عون، 16 سالہ قندیل اور 14 سالہ دانیال زخمی ہوئے۔ریسکیو اہلکاروں نے موقع پر پہنچ کر پیشہ ورانہ مہارت کا مظاہرہ کرتے ہوئے تمام زخمیوں کو ابتدائی طبی امداد فراہم کی۔ زخمیوں کو سر پر چوٹیں، ناک سے خون بہنا، آنکھ کے قریب زخم، کھوپڑی کے فریکچر اور ٹانگ کی ہڈی ٹوٹنے سمیت مختلف نوعیت کی چوٹیں آئیں۔بعدازاں تمام زخمیوں کو مزید طبی معائنے اور علاج معالجے کیلئے تحصیل ہیڈکوارٹر ہسپتال فتح پور منتقل کر دیا گیا۔ریسکیو 1122 حکام کے مطابق بروقت اور مؤثر کارروائی کے باعث زخمیوں کو فوری طبی سہولیات کی فراہمی یقینی بنائی گئی۔ریسکیو حکام نے شہریوں کو ہدایت کی ہے کہ دورانِ سفر ٹریفک قوانین کی پابندی کریں، رفتار کو قابو میں رکھیں اور محفوظ فاصلہ برقرار رکھیں تاکہ حادثات سے بچا جا سکے۔
