لَیَّہ: فوڈ پوائزننگ سے ایک ہی گھر کے 5 افراد کی حالت غیر، ریسکیو 1122 کا فوری رسپانس، توری کا سالن کھانے کے بعد الٹیوں اور تیز بخار کی شکایت، متاثرین ڈی ایچ کیو ہسپتال منتقل

لَیَّہ (نمائندہ لیہ ٹی وی) لَیَّہ کے علاقے بھٹی نگر بائی پاس روڈ پر فوڈ پوائزننگ کے باعث ایک ہی گھر کے پانچ افراد کی طبیعت خراب ہو گئی، جس پر ریسکیو 1122 نے فوری کارروائی کرتے ہوئے متاثرین کو طبی امداد فراہم کر دی۔ریسکیو ذرائع کے مطابق ابتدائی معلومات میں بتایا گیا ہے کہ متاثرہ افراد نے رات اور ناشتے میں توری کا سالن کھایا تھا، جس کے بعد انہیں الٹیوں اور ہائی گریڈ بخار کی شکایات لاحق ہوئیں۔اطلاع ملتے ہی ریسکیو 1122 کی ٹیم فوری طور پر موقع پر پہنچی اور پیشہ ورانہ مہارت کا مظاہرہ کرتے ہوئے متاثرہ افراد کو ابتدائی طبی امداد فراہم کی۔ بعدازاں تمام مریضوں کو مزید علاج معالجے کیلئے ڈی ایچ کیو ہسپتال لَیَّہ منتقل کر دیا گیا۔ریسکیو حکام کے مطابق بروقت کارروائی کے باعث متاثرین کو فوری طبی سہولیات کی فراہمی یقینی بنائی گئی۔ریسکیو 1122 نے شہریوں سے اپیل کی ہے کہ خوراک کے استعمال میں احتیاط برتیں اور کسی بھی ہنگامی صورتحال میں فوری طور پر ریسکیو ادارے سے رابطہ کریں۔