لَیَّہ: پالتو کتے کے کاٹنے سے بچی زخمی، ریسکیو 1122 کا فوری رسپانس دین پور، کروڑ لعل عیسن میں پیش آنے والے واقعہ کے بعد بچی کو ابتدائی طبی امداد دے کر ٹی ایچ کیو ہسپتال منتقل کر دیا گیا

لَیَّہ (نمائندہ لیہ ٹی وی) لَیَّہ کی تحصیل کروڑ لعل عیسن کے علاقے دین پور میں پالتو کتے کے کاٹنے سے ایک بچی زخمی ہو گئی، جس پر ریسکیو 1122 نے فوری کارروائی کرتے ہوئے متاثرہ بچی کو طبی امداد فراہم کی۔ریسکیو ذرائع کے مطابق ابتدائی معلومات میں بتایا گیا ہے کہ متاثرہ بچی گھر کے باہر بندھے ہوئے پالتو کتے کو چھوڑنے گئی تو کتے نے اچانک اس کی بائیں ٹانگ، گھٹنے کے قریب کاٹ لیا، جس کے نتیجے میں گہرا زخم آیا اور خون بہنا شروع ہوگیا۔اطلاع ملنے پر ریسکیو 1122 کی ٹیم فوری طور پر موقع پر پہنچی اور پیشہ ورانہ مہارت کا مظاہرہ کرتے ہوئے بچی کو ابتدائی طبی امداد فراہم کی، زخم کو صاف کیا اور مرہم پٹی کی۔بعدازاں متاثرہ بچی کو مزید علاج معالجے کیلئے تحصیل ہیڈکوارٹر ہسپتال کروڑ منتقل کر دیا گیا۔ریسکیو حکام کے مطابق بروقت کارروائی کے باعث مریضہ کو فوری طبی سہولیات کی فراہمی یقینی بنائی گئی۔ریسکیو 1122 نے شہریوں کو ہدایت کی ہے کہ پالتو جانوروں کو محفوظ انداز میں باندھ کر رکھا جائے اور بچوں کو ان کے قریب اکیلا نہ جانے دیا جائے، جبکہ کسی بھی ہنگامی صورتحال میں فوری طور پر ریسکیو 1122 سے رابطہ کیا جائے۔