لیہ(نمائندہ لیہ ٹی وی)سیف سٹی پراجیکٹ ضلع لیہ میں فعال، عوام کے جان و مال کے تحفظ کو یقینی بنایا جائے گا: ڈپٹی کمشنر آصف علی ڈوگر۔ تفصیلات کے مطابق گزشتہ روز ڈپٹی کمشنر آصف علی ڈوگر نے ڈی پی او آفس میں قائم سیف سٹی پراجیکٹ کے کنٹرول روم کا دورہ کیا جہاں انہوں نے مانیٹرنگ سسٹم، رسپانس ورکنگ اور ڈیوٹی پر موجود سٹاف کی کارکردگی کا تفصیلی جائزہ لیا۔ اس موقع پر ڈسٹرکٹ پولیس آفیسر حسن جاوید اور دیگر متعلقہ افسران بھی ان کے ہمراہ تھے۔ ڈپٹی کمشنر آصف علی ڈوگر نے کنٹرول روم میں نصب جدید مانیٹرنگ سسٹم، کیمروں اور ریسپانس میکنزم کا معائنہ کرتے ہوئے کہا کہ شہریوں کے تحفظ اور امن و امان کے قیام کے لیے ہر ممکن اقدامات بروئے کار لائے جا رہے ہیں۔ انہوں نے کہا کہ وزیر اعلیٰ پنجاب مریم نواز شریف کے وژن کے مطابق ضلع لیہ میں سیف سٹی پراجیکٹ کو مؤثر انداز میں فعال کر دیا گیا ہے تاکہ جدید ٹیکنالوجی کے ذریعے سکیورٹی نظام کو مزید بہتر بنایا جا سکے۔ ڈپٹی کمشنر نے کہا کہ عیدالاضحیٰ، بکر منڈیوں کی مانیٹرنگ، ستھرا پنجاب مہم، پیرا فورس اور واسا کی کارکردگی کی نگرانی کے ساتھ ساتھ آمدہ محرم الحرام کے دوران فول پروف سکیورٹی انتظامات یقینی بنانے کے لیے سیف سٹی پراجیکٹ سے بھرپور استفادہ کیا جائے گا۔ ڈسٹرکٹ پولیس آفیسر حسن جاوید نے اس موقع پر کہا کہ جدید مانیٹرنگ اور فوری رسپانس سسٹم کی بدولت جرائم کی روک تھام، ٹریفک نظم و ضبط اور شہریوں کے جان و مال کے تحفظ کو مزید مؤثر بنایا جا رہا ہے۔
