لیہ(نمائندہ لیہ ٹی وی)لع لیہ میں محکمہ سماجی بہبود و بیت المال پنجاب کے زیر اہتمام پیشہ ور گداگروں کے خلاف آگاہی مہم بھرپور انداز میں جاری ہے۔ ڈپٹی ڈائریکٹر سوشل ویلفیئر خضر حیات خان نے اپنے بیان میں کہا ہے کہ پنجاب حکومت اور سیکرٹری سوشل ویلفیئر اینڈ بیت المال پنجاب کی ہدایات کی روشنی میں پیشہ ور بھکاریوں کی حوصلہ شکنی اور عوامی شعور بیدار کرنے کے لیے مختلف آگاہی سیمینارز اور مہمات کا انعقاد کیا جا رہا ہے۔ انہوں نے بتایا کہ ضلع کی تمام تحصیلوں اور شہر لیہ میں اسسٹنٹ ڈائریکٹرز سوشل ویلفیئر اینڈ بیت المال کی قیادت میں مقامی این جی اوز کے تعاون سے آگاہی مہم تیزی سے جاری ہے۔ اسی سلسلے میں طاہرہ سعادت، مینیجر صنعت زار، کی جانب سے خواتین کے اداروں میں خصوصی آگاہی سیشنز بھی منعقد کیے گئے، جن میں پیشہ ور گداگری کے منفی سماجی اثرات سے آگاہ کیا گیا۔ ڈپٹی ڈائریکٹر سوشل ویلفیئر نے مزید بتایا کہ پنجاب پولیس کے تعاون سے محکمہ سوشل ویلفیئر کی ٹیمیں پیشہ ور بھکاریوں کے خلاف کارروائیاں بھی کر رہی ہیں اور مختلف مقامات پر ایسے عناصر کے خلاف قانونی اقدامات کا سلسلہ جاری ہے۔ انہوں نے کہا کہ “Say No to Begging” کے پیغام کو عام کرتے ہوئے محکمہ سوشل ویلفیئر کی ٹیمیں عوام الناس میں شعور اجاگر کرنے اور پیشہ ور گداگری کے خاتمے کے لیے متحرک کردار ادا کر رہی ہیں۔
