لیہ (نمائندہ لیہ ٹی وی) لیہ کے نواحی علاقہ بھٹہ چوک بستی کہنہ میں واپڈا کی مبینہ غفلت اور نااہلی ایک معصوم بچے کی جان لے گئی۔ 11 ہزار کے وی کی بجلی کی خطرناک تاریں گھروں کی چھتوں سے انتہائی قریب ہونے کے باعث 7 سالہ بچہ محمد شہباز کرنٹ لگنے سے جاں بحق ہوگیا۔ افسوسناک واقعہ کے بعد اہل علاقہ اور ورثاء نے شدید احتجاج کرتے ہوئے واپڈا حکام کے خلاف نعرے بازی کی۔
اہل خانہ کے مطابق واقعہ اس وقت پیش آیا جب کمسن محمد شہباز گھر کی چھت پر موجود تھا کہ اچانک بجلی کی ہائی وولٹیج تاروں سے کرنٹ منتقل ہونے کے باعث وہ شدید جھلس گیا۔ بچے کو فوری طور پر طبی امداد کیلئے منتقل کرنے کی کوشش کی گئی تاہم وہ جانبر نہ ہوسکا۔جاں بحق ہونے والے بچے کے والد محمد اعظم نے نمائندہ جنگ سے گفتگو کرتے ہوئے بتایا کہ علاقہ مکین متعدد بار واپڈا حکام کو درخواستیں دے چکے ہیں کہ 11 ہزار کے وی کی تاریں گھروں کی چھتوں سے اوپر کی جائیں کیونکہ بارش کے دوران پورے گھروں میں کرنٹ پھیل جاتا ہے اور لوگ خوف و ہراس میں مبتلا رہتے ہیں، مگر کسی نے مسئلہ حل کرنے کی سنجیدہ کوشش نہیں کی۔انہوں نے کہا کہ سیاسی شخصیات ووٹ لینے کے وقت بڑے بڑے وعدے کرتی ہیں لیکن عوامی مسائل جوں کے توں رہتے ہیں۔ ان کا کہنا تھا کہ بارش کے موسم میں صورتحال مزید خطرناک ہوجاتی ہے اور اہل خانہ کو اپنی جانیں بچانے کیلئے دوسری جگہ منتقل ہونا پڑتا ہے۔جاں بحق بچے کے چچا سکندر عباس، غلام فرید، محمد شکیل، محمد اسماعیل، محمد فیاض میرانی اور دیگر اہل علاقہ نے شدید احتجاج کرتے ہوئے کہا کہ واپڈا کی مکمل نااہلی اور غفلت کے باعث ہائی وولٹیج تاریں گھروں کی چھتوں کو چھو رہی ہیں، جس سے کسی بھی وقت مزید بڑے حادثات رونما ہوسکتے ہیں۔اہل علاقہ نے مطالبہ کیا کہ فوری طور پر 11 ہزار کے وی کی تاروں کو محفوظ فاصلے پر منتقل کیا جائے، ذمہ دار اہلکاروں کے خلاف کارروائی کی جائے اور متاثرہ خاندان کو مالی امداد فراہم کی جائے تاکہ آئندہ کسی اور معصوم جان کا نقصان نہ ہو۔
[2:10 pm, 09/05/2026] Jang Watsapp No. News News Watsapp:
