لیہ (نمائندہ لیہ ٹی وی) انٹرنیشنل فائر فائٹرز ڈے کے موقع پر ریسکیو 1122 لیہ کی جانب سے فائر فائٹرز کو خراجِ تحسین پیش کیا گیا۔ اس حوالے سے ڈسٹرکٹ ایمرجنسی آفیسر ڈاکٹر سجاد احمد کی زیر نگرانی ضلع بھر کے فائر اسٹیشنز میں خصوصی تقریبات کا انعقاد کیا گیا۔تقریبات کے دوران شہداء فائر فائٹرز کو خراجِ عقیدت پیش کیا گیا اور ان کی لازوال قربانیوں کو سراہا گیا۔ ریسکیو اہلکاروں نے اپنے فرائض کی انجام دہی کے دوران پیش آنے والے چیلنجز کا ذکر کرتے ہوئے عوام کی جان و مال کے تحفظ کے عزم کا اعادہ کیا۔اس موقع پر ڈسٹرکٹ ایمرجنسی آفیسر ڈاکٹر سجاد احمد نے کہا کہ فائر فائٹرز ہنگامی حالات میں اپنی جانوں کو خطرے میں ڈال کر دوسروں کی زندگیاں بچاتے ہیں، جو ایک عظیم خدمت ہے۔ انہوں نے کہا کہ انٹرنیشنل فائر فائٹرز ڈے ہمیں ان بہادر افراد کی قربانیوں کو یاد رکھنے اور ان کے جذبے کو سراہنے کا موقع فراہم کرتا ہے۔تقریب کے اختتام پر شہداء کے درجات کی بلندی اور ملک و قوم کی سلامتی کے لیے خصوصی دعا کی گئی، جبکہ اس عزم کا اعادہ کیا گیا کہ ریسکیو 1122 ہر ممکن حالات میں عوام کی خدمت جاری رکھے گا۔
