لیہ (نمائندہ لیہ ٹی وی) وزیر اعلیٰ پنجاب مریم نواز شریف کی زیر صدارت پنجاب ڈویلپمنٹ پروگرام کا اہم جائزہ اجلاس منعقد ہوا، جس میں متعلقہ اضلاع کے ڈپٹی کمشنرز نے ویڈیو لنک کے ذریعے شرکت کی۔ ڈپٹی کمشنر لیہ آصف علی ڈوگر نے ضلع لیہ کی نمائندگی کرتے ہوئے اجلاس میں شریک ہوئے۔ وزیراعلیٰ پنجاب نے اجلاس کے دوران پنجاب ڈویلپمنٹ پروگرام کے تحت سیوریج سسٹم، ٹف ٹائلز، پارکوں کی تعمیر و تزئین و آرائش، سٹریٹ لائٹس اور دیگر شہری سہولیات سے متعلق منصوبوں پر ہونے والی پیش رفت کا تفصیلی جائزہ لیا۔ انہوں نے ہدایت کی کہ تمام ترقیاتی سکیمیں مقررہ مدت میں مکمل کی جائیں اور کام کے معیار پر کسی قسم کا سمجھوتہ نہ کیا جائے۔ وزیر اعلیٰ پنجاب نے کہا کہ پنجاب ڈویلپمنٹ پروگرام سے اضلاع میں جدید شہری سہولیات کا نیا باب شروع ہوگا اور عوام کو دیرپا اور معیاری سہولیات فراہم کی جائیں گی۔ انہوں نے متعلقہ ڈپٹی کمشنرز کو ہدایت کی کہ وہ ترقیاتی کاموں کی خود نگرانی یقینی بنائیں تاکہ شفافیت اور معیار برقرار رکھا جا سکے۔ وزیراعلیٰ نے خصوصی طور پر بارش کے پانی کو محفوظ بنانے کے منصوبوں پر توجہ مرکوز کرنے کی ہدایت دیتے ہوئے کہا کہ زیر زمین واٹر ٹینکس کی تعمیر کو تیز کیا جائے اور برساتی موسم سے قبل اس مرحلے کو مکمل کیا جائے۔ یاد رہے ضلع لیہ میں پنجاب ڈویلپمنٹ پروگرام کے تحت 9 ارب روپے سے زائد لاگت کے منصوبوں پر کام کا آغاز ہو چکا ہے، جبکہ ابتدائی مرحلے میں بارش کے پانی کو ذخیرہ کرنے کے لیے زیر زمین ٹینک کی تعمیر تیزی سے جاری ہے۔
