لیہ (نمائندہ لیہ ٹی وی) مینیجنگ ڈائریکٹر ستھرا پنجاب کمپنی لیہ و ایڈیشنل ڈپٹی کمشنر جنرل شبیر احمد ڈوگر نے لیہ سٹی کا دورہ کیا اور شہر کے مختلف پارکس، ہاؤسنگ کالونی اور غلہ منڈی میں صفائی ستھرائی کے انتظامات کا تفصیلی جائزہ لیا۔ اس موقع پر متعلقہ افسران بھی ان کے ہمراہ تھے۔ اے ڈی سی جی نے صفائی کی مجموعی صورتحال کا معائنہ کرتے ہوئے متعلقہ عملے کو ہدایت کی کہ صفائی کے معیار کو مزید بہتر بنایا جائے اور تمام علاقوں میں مستقل بنیادوں پر صفائی یقینی بنائی جائے۔ انہوں نے کہا کہ شہریوں کو صاف ستھرا ماحول فراہم کرنا ضلعی انتظامیہ کی اولین ترجیح ہے، اس سلسلے میں کسی قسم کی غفلت برداشت نہیں کی جائے گی۔ انہوں نے مزید ہدایت کی کہ پارکس اور رہائشی علاقوں میں خصوصی توجہ دی جائے اور کوڑا کرکٹ بروقت ٹھکانے لگانے کے لیے موثر حکمت عملی اپنائی جائے تاکہ شہر کو صاف اور خوبصورت بنایا جا سکے۔ انہوں نے مزید کہا کہ کوڑا کرکٹ ویسٹ بن اور عارضی کولیکشن پوائنٹس سے فوری اٹھایا جائے اور مستقل ڈمپنگ سائٹ پر منتقل کیا جائے۔ ایڈیشنل ڈپٹی کمشنر جنرل نے کہا کہ غلہ منڈی/ فوڈ سٹریٹ کو شفٹوں کے تحت صاف رکھنے کے لئے ڈیوٹیاں لگائی جائیں تاکہ صارفین کو خوشگوار ماحول میسر آئے۔
