لیہ (نمائندہ لیہ ٹی وی)پنجاب فوڈ اتھارٹی نے ڈائریکٹر جنرل پنجاب فوڈ اتھارٹی سید موسیٰ رضا کی خصوصی ہدایات پر لیہ شہر کے مختلف علاقوں میں رات گئے ناکہ بندی کرتے ہوئے دودھ بردار گاڑیوں اور ملک شاپس کی چیکنگ کی۔ کارروائی کے دوران 26 دودھ بردار گاڑیوں سمیت 2 ملک شاپس میں موجود 17 ہزار لیٹر سے زائد دودھ کی جانچ پڑتال کی گئی۔ ٹیسٹ کے دوران دودھ کے سیمپل فیل ہونے پر 29 من کے قریب ملاوٹی دودھ تلف کر دیا گیا۔ حکام کے مطابق دودھ میں فارملین اور پانی کی ملاوٹ ثابت ہونے پر ایک گاڑی میں موجود ایک ہزار لیٹر دودھ موقع پر ضائع کر دیا گیا، جبکہ ایک ملک شاپ سے4 من کے قریب غیر معیاری دودھ برآمد ہونے پر اسے بھی تلف کر دیا گیا۔پنجاب فوڈ اتھارٹی کی ٹیموں نے کارروائی کے دوران فوڈ بزنس آپریٹرز پر بھاری جرمانے بھی عائد کیے۔ حکام کا کہنا تھا کہ شہریوں کو ملاوٹ سے پاک اور معیاری دودھ کی فراہمی پنجاب فوڈ اتھارٹی کی اولین ترجیح ہے۔حکام نے شہریوں کو آگاہ کیا کہ گھروں میں استعمال ہونے والا دودھ پنجاب فوڈ اتھارٹی کے کسی بھی دفتر سے مفت ٹیسٹ کرایا جا سکتا ہے تاکہ ملاوٹ کے خلاف مؤثر اقدامات کو یقینی بنایا جا سکے۔
