لیہ(نمائندہ لیہ ٹی وی) وزیر اعلیٰ پنجاب مریم نواز شریف کے وژن "گرین پنجاب” کے تحت ضلع لیہ میں شجرکاری کے اقدامات تسلسل کے ساتھ جاری ہیں۔ ارتھ ڈے کے موقع پر ڈپٹی کمشنر آصف علی ڈوگر نے ڈسٹرکٹ کمپلیکس میں محکمہ جنگلات کے زیر اہتمام اربن پلانٹیشن مہم کے تحت پودا لگایا۔ اس موقع پر اسسٹنٹ کمشنر لیہ زوہیب کریم، ڈپٹی کنزرویٹر فاریسٹ ڈاکٹر فضل الرحمان شاہ، امجد ندیم رونگھہ، اسسٹنٹ ڈائریکٹر ماحولیات ارشد چغتائی اور میڈیا نمائندگان بھی موجود تھے۔ شرکاء نے بھی پودے لگا کر شجرکاری مہم میں حصہ لیا۔ ڈپٹی کمشنر آصف علی ڈوگر نے اس موقع پر گفتگو کرتے ہوئے کہا کہ ارتھ ڈے کے موقع پر اربن پلانٹیشن مہم ایک مثبت اور خوبصورت پیغام ہے۔ انہوں نے کہا کہ ضلع لیہ ایک گرم خطہ ہے جہاں درختوں اور پودوں کی اشد ضرورت ہے۔ انہوں نے مزید کہا کہ ضلع میں شجرکاری مہم تسلسل کے ساتھ جاری ہے اور لگائے جانے والے پودوں کی مکمل آبیاری پر خصوصی توجہ دی جا رہی ہے تاکہ یہ پودے مستقبل میں سایہ دار درخت بن کر اہلیانِ لیہ کو صاف اور خوشگوار ماحول فراہم کر سکیں۔ ڈپٹی کنزرویٹر فاریسٹ ڈاکٹر فضل الرحمان شاہ نے بتایا کہ ضلع لیہ میں رواں سال 1100 ایکڑ رقبہ پر 7 لاکھ سے زائد پودے لگائے جا چکے ہیں جبکہ ارتھ ڈے کے موقع پر مزید 500 پودے لگائے جا رہے ہیں۔ اسسٹنٹ ڈائریکٹر ماحولیات ارشد چغتائی نے کہا کہ ارتھ ڈے کا بنیادی پیغام زمین کی حفاظت اور ماحولیاتی تحفظ ہے، اور درخت اس مقصد کے حصول کا بہترین ذریعہ ہیں۔
