ضلع لیہ میں صفائی ستھرائی اور شہری سہولیات کی بہتری کے لیے اقدامات جاری

لیہ(نمائندہ لیہ ٹی وی)وزیراعلیٰ پنجاب مریم نواز کے ویژن کے مطابق ضلع لیہ میں صفائی ستھرائی اور شہری سہولیات کی بہتری کے لیے اقدامات جاری ہیں۔ ایڈیشنل ڈپٹی کمشنر جنرل لیہ شبیر احمد ڈوگر نے ڈیپ کلین تحصیل کیمپین کے تحت شوگر مل کالونی تا لیہ مائنر، سروس روڈ سمیت مختلف مقامات کا دورہ کیا۔انہوں نے ستھرائی کی مجموعی صورتحال، نکاسی آب، کوڑا کرکٹ کی بروقت تلفی اور عملے کی حاضری و کارکردگی کا تفصیلی جائزہ لیا گیا۔اس موقع پر ایڈیشنل ڈپٹی کمشنر جنرل نے متعلقہ افسران و عملے کو ہدایت کی کہ صفائی کے معیار کو مزید بہتر بنانے کے لیے تمام دستیاب وسائل بروئے کار لائے جائیں، اہم شاہراہوں اور رہائشی علاقوں میں خصوصی توجہ دی جائے اور کوڑا کرکٹ کی فوری منتقلی کو یقینی بنایا جائے تاکہ شہریوں کو صاف ستھرا اور صحت مند ماحول میسر آ سکے۔ انہوں نے یہ بھی ہدایت کی کہ ڈیپ کلین کیمپین کے اہداف کے مطابق روزانہ کی بنیاد پر کارکردگی کو مانیٹر کیا جائے۔ایڈیشنل ڈپٹی کمشنر جنرل شبیر احمد ڈوگر نے جنرل بس سٹینڈ لیہ کی ریموڈلنگ و ڈویلپمنٹ کے جاری کام کا بھی دورہ کیا۔ انہوں نے منصوبے کی پیش رفت، معیار اور رفتار کا جائزہ لیتے ہوئے متعلقہ ٹھیکیدار کو ہدایت کی کہ کام کو مقررہ معیار کے مطابق بروقت مکمل کیا جائے جبکہ مسافروں کی سہولت اور حفاظت کے پیش نظر تمام ضروری انتظامات اور حفاظتی اقدامات کو ہر صورت یقینی بنایا جائے۔