لیہ(نمائندہ لیہ ٹی وی) یونیورسٹی آف لیہ کے فیکلٹی آف ایگریکلچر سائنس اینڈ ٹیکنالوجی کے زیر اہتمام گندم کی کٹائی کا باقاعدہ آغاز کر دیا گیا۔ اس موقع پر وائس چانسلر ڈاکٹر محمد زبیر ابوبکر نے فیکلٹی ممبران کے ہمراہ خود درانتی چلا کر کٹائی مہم کا افتتاح کیا، جسے حاضرین نے بھرپور سراہا۔ تقریب میں ڈاکٹر ذیشان حسن، ڈاکٹر عنبرین شاہجہاں، ڈاکٹر محمد علی سمیت دیگر اساتذہ اور طلبہ و طالبات کی کثیر تعداد نے شرکت کی۔ اس موقع پر ایک پُرجوش اور تعلیمی ماحول دیکھنے میں آیا جہاں طلبہ نے عملی طور پر زرعی سرگرمیوں میں بھرپور دلچسپی کا اظہار کیا۔اپنے خطاب میں وائس چانسلر ڈاکٹر محمد زبیر ابوبکر نے کہا کہ یونیورسٹی کا مقصد جدید زرعی ٹیکنالوجی کو فروغ دینا، تحقیق کو عملی شکل دینا اور زرعی شعبے میں کاروباری مواقع کو بڑھانا ہے۔ انہوں نے مزید کہا کہ اس قسم کی عملی سرگرمیاں طلبہ کی پیشہ ورانہ صلاحیتوں کو نکھارتی ہیں اور انہیں مستقبل کے چیلنجز سے نمٹنے کے قابل بناتی ہیں۔ تقریب کے اختتام پر طلبہ کی جانب سے وائس چانسلر کو گندم کا خوبصورت گلدستہ پیش کیا گیا، جس پر انہوں نے مسرت کا اظہار کرتے ہوئے طلبہ کی کاوشوں کو سراہا۔
