لیہ(نمائندہ لیہ ٹی وی)ضلع لیہ میں جاری مسلسل بارشوں کے پیش نظر بارش کا پانی نکالنے کے لیے آپریشن کو مزید تیز کر دیا گیا۔وزیراعلیٰ پنجاب مریم نواز شریف کے ویژن کے مطابق ڈپٹی کمشنر اصف علی ڈوگر نے واسا حکام،ڈسپوزل اسٹیشنز کے افسران اور فیلڈ سٹاف کو ہنگامی بنیادوں پر طلب کر کے شہر بھر میں پانی کی نکاسی کے عمل کی رفتار کو مزید تیز کرنے کی ہدایات جاری کیں۔ڈپٹی کمشنر نے متعلقہ افسران کو ہدایت کی کہ وہ ڈسپوزل اسٹیشنز اور شہر کے مختلف علاقوں کا دورہ کریں نکاسی آب کے جاری آپریشن،مشینری کی ورکنگ اور فیلڈ میں موجود عملے کی کارکردگی کا جائزہ لیں۔انہوں نے کہا کہ تمام ڈسپوزل اسٹیشنز کو مکمل صلاحیت کے ساتھ فعال رکھا جائے تاکہ شاہراہوں، اہم چوراہوں، نشیبی علاقوں اور شہری آبادیوں سے بارش کے پانی کی فوری اور بروقت نکاسی کو یقینی بنایا جا سکے۔ڈپٹی کمشنر نے مزید کہا کہ ممکنہ اضافی بارش کی پیشگوئی کے پیش نظر تمام متعلقہ افسران اور عملہ مکمل الرٹ رہیں اپنی حدود میں موصول ہونے والی شکایات کا فوری ازالہ کیا جائے اور تمام سیوریج و ڈسپوزل اسٹیشنز کے افسران اور عملہ بارش کے پانی کی نکاسی کے آپریشن مکمل ہونے تک فیلڈ میں موجود رہیں۔
