لیہ(نمائندہ لیہ ٹی وی )ڈپٹی کمشنر آصف علی ڈوگر کی زیر صدارت مارکیٹ کمیٹی اور محکمہ زراعت کا اجلاس منعقد ہوا۔اجلاس میں ایڈیشنل ڈپٹی کمشنر جنرل شبیر احمد ڈوگر، سیکرٹری مارکیٹ کمیٹی سید عمران شہزاد اور اسسٹنٹ ڈائریکٹر زراعت محمد شہباز کھوکھر موجود تھے۔ڈپٹی کمشنر آصف علی ڈوگر نے اس موقع پر کہا کہ سبزی منڈی میں بولی کے نظام اور اشیائے خوردونوش کے ریٹ کی کڑی نگرانی وقت کی اہم ضرورت ہے۔انہوں نے کہا کہ منڈی میں فروخت ہونے والی سبزی اور پھلوں کا مکمل ریکارڈ رکھا جائے کسی بھی قسم کی غیر ضروری مہنگائی یا من مانی نہ ہو پیاز، ٹماٹر اور دیگر سبزیوں پر خاص توجہ دی جائے اور پرائس کنٹرول مجسٹریٹ بروقت نگرانی کریں تاکہ مقررہ نرخوں پر فروخت یقینی بنائی جا سکے۔ڈپٹی کمشنر نے کہا کہ ریٹ لسٹ بروقت دکانداروں کو فراہم کی جائے اور پٹرول کی بڑھتی قیمتوں کے پیش نظر مناسب منافع کے اصول کے تحت اشیاء فروخت کی جائیں۔انہوں نے واضح کیا کہ مقررہ کمیشن سے تجاوز ہرگز نہیں کیا جانا چاہیے اور ضلع میں مارکیٹ میں استحکام اور شفافیت کو یقینی بنانے کے لیے ضلعی انتظامیہ تمام اقدامات کر رہی ہے۔
