لیہ(نمائندہ لیہ ٹی وی ) یونیورسٹی آف لیہ کے مین کیمپس میں فیکلٹی ہاسٹل کا باقاعدہ افتتاح کر دیا گیا۔ افتتاحی تقریب کے مہمانِ خصوصی وائس چانسلر پروفیسر ڈاکٹر زبیر ابوبکر تھے، جنہوں نے ہاسٹل کا افتتاح کیا اور منصوبے کو یونیورسٹی کی ترقی کی جانب اہم پیش رفت قرار دیا۔تقریب میں انچارج مین کیمپس ڈاکٹر محمد علی بزدار، رجسٹرار راشد کلاسرہ سمیت فیکلٹی ممبران کی بڑی تعداد شریک ہوئی۔ اس موقع پر ڈاکٹر اظہر، ڈاکٹر ذیشان حسن، ڈاکٹر امبرین شاہجہان اور ڈاکٹر سعدیہ، ڈاکٹر طاہرہ ، ڈویژنل فاریسٹ آفیسر ڈاکٹر فضل الرحمان بھی موجود تھے۔افتتاح کے بعد کیمپس میں شجرکاری مہم کا بھی آغاز کیا گیا، جس میں وائس چانسلر اور دیگر اساتذہ نے پودے لگا کر ماحول دوست سرگرمی کا عملی مظاہرہ کیا۔اس موقع پر گفتگو کرتے ہوئے وائس چانسلر پروفیسر ڈاکٹر زبیر ابوبکر نے کہا کہ یونیورسٹی آف لیہ میں جدید سہولیات کی فراہمی کے لیے مسلسل اقدامات کیے جا رہے ہیں تاکہ اساتذہ اور طلبہ کو بہتر تعلیمی ماحول فراہم کیا جا سکے۔ انہوں نے مزید کہا کہ فیکلٹی کی سہولت اور رہائش کے لیے ہاسٹل کا قیام ایک اہم قدم ہے، جس سے تدریسی عمل میں بہتری آئے گی۔انہوں نے بتایا کہ یونیورسٹی میں شجرکاری مہم بھی بڑے پیمانے پر جاری ہے، جس کا مقصد نہ صرف کیمپس کو سرسبز بنانا ہے بلکہ ماحولیاتی بہتری میں بھی کردار ادا کرنا ہے۔تقریب کے اختتام پر شرکاء نے اس عزم کا اظہار کیا کہ یونیورسٹی کی ترقی اور تعلیمی معیار کو مزید بہتر بنانے کے لیے مشترکہ کوششیں جاری رکھی جائیں گی۔
