لیہ(نمائندہ لیہ ٹی وی )ڈپٹی کمشنر آصف علی ڈوگر کی زیر صدارت انجمن تاجران کے عہدےداروں کا اجلاس منعقد ہوا ۔ڈسٹرکٹ پولیس آفیسر حسن جاوید بھٹی موجود تھے۔اجلاس میں ایڈیشنل ڈپٹی کمشنر جنرل شبیر احمد ڈوگر، صدر انجمن تاجران محمد اظہر ہانس،سیکرٹری مارکیٹ کمیٹی سید عمران شہزاد ودیگر موجود تھے۔ڈپٹی کمشنر نے اس موقع پر کہا کہ موجودہ معاشی صورتحال عالمی سطح پر درپیش چیلنجز کا نتیجہ ہے جس کے اثرات مقامی مارکیٹوں اور عام آدمی پر بھی مرتب ہو رہے ہیں تاہم حکومت پنجاب عوام کو زیادہ سے زیادہ ریلیف فراہم کرنے کے لیے بھرپور اقدامات کر رہی ہے۔انہوں نے کہا کہ ایسے حالات میں تاجر برادری کا کردار انتہائی اہمیت کا حامل ہے اور وہ ہمیشہ کی طرح ذمہ داری، بردباری اور قومی مفاد کو مقدم رکھتے ہوئے اپنا مثبت کردار ادا کرے گی تاکہ اشیائے ضروریہ کی قیمتوں میں استحکام برقرار رہے اور عوام کو بلاجواز مشکلات کا سامنا نہ کرنا پڑے۔ڈپٹی کمشنر آصف علی ڈوگر نے کہا کہ حکومت کی جانب سے مختلف طبقات کے لیے ریلیف پیکجز اور سہولیات کی فراہمی پر کام تیزی سے جاری ہے اور خصوصاً موٹرسائیکل استعمال کرنے والے شہریوں کے لیے پٹرول کی مد میں ریلیف فراہم کرنے کے حوالے سے پالیسی کو جلد حتمی شکل دی جا رہی ہے تاکہ متوسط اور کم آمدن والے طبقے کو براہ راست فائدہ پہنچایا جا سکے۔۔انہوں نے مزید کہا کہ حکومت اور تاجر برادری کا باہمی تعاون ہی عوامی ریلیف کا ضامن ہے اور اس سلسلے میں مشترکہ کوششوں سے ہی مثبت نتائج حاصل کیے جا سکتے ہیں۔اجلاس میں تاجر نمائندگان نے ضلعی انتظامیہ کے ساتھ مکمل تعاون جاری رکھنے کے عزم کا اظہار کیا اور یقین دہانی کرائی کہ وہ عوامی سہولت اور ملکی مفاد کو مدنظر رکھتے ہوئے اپنی ذمہ داریاں ادا کرتے رہیں گے۔
