لیہ(نمائندہ لیہ ٹی وی )ڈپٹی کمشنر آصف علی ڈوگر کی ہدایت پر ڈسٹرکٹ ہیلتھ اتھارٹی لیہ نے THQ تھل (MNS) ہسپتال لیہ کے پیڈز او پی ڈی روم میں 31 مارچ 2026 کی شام پیش آنے والے غیر اخلاقی و غیر پیشہ ورانہ سرگرمیوں کے واقعہ کی تحقیقات کے لیے انکوائری کمیٹی تشکیل دے دی ہے۔ جاری کردہ حکم نامے کے مطابق کمیٹی میں ڈاکٹر خادم حسین (APMO/BS-19) بطور چیئرمین، ڈاکٹر محمد ارشد (کنسلٹنٹ پیڈیاٹریشن/BS-18) بطور ممبر اور احسن علی (ہیڈ کلرک/BS-16) بطور ممبر شامل ہیں۔ کمیٹی کو ہدایت کی گئی ہے کہ وہ واقعہ کی مکمل تحقیقات کر کے ذمہ داران کا تعین کرے اور اپنی مفصل رپورٹ سفارشات سمیت تین دن کے اندر پیش کرے۔ دریں اثناء ڈسٹرکٹ ہیلتھ اتھارٹی لیہ نے اسی واقعہ کے تناظر میں THQ تھل (MNS) ہسپتال لیہ کے چوکیدار محمد صادق (BS-01) کو پنجاب ایمپلائز ایفیشنسی، ڈسپلن اینڈ اکاؤنٹیبلٹی ایکٹ 2006 کے سیکشن 6 کے تحت معطل کر دیا ہے۔ اس حوالے سے جاری احکامات کی نقول متعلقہ افسران کو ارسال کر دی گئی ہیں۔
