لیہ(نمائندہ لیہ ٹی وی ) ڈی ایس پی پٹرولنگ ضلع لیہ راؤ عمر فاروق کی زیر صدارت گڈز ٹرانسپورٹرز و اڈا مالکان کا اجلاس منعقد ہوا جس میں ٹرانسپورٹ سے متعلق امور اور شاہرات کی سیکیورٹی اقدامات کا جائزہ لیا گیا۔ اجلاس میں ٹرانسپورٹ یونین و اڈا مالکان نے شرکت کی۔ اس موقع پر شرکاء کو ضلع کی حدود میں پٹرولنگ پولیس کی جانب سے شاہرات کو محفوظ بنانے، ٹریفک نظم و ضبط برقرار رکھنے اور حادثات کی روک تھام کے لیے کیے گئے اقدامات سے آگاہ کیا گیا۔ ڈی ایس پی راؤ عمر فاروق نے خطاب کرتے ہوئے کہا کہ پٹرولنگ پولیس شہریوں کے جان و مال کے تحفظ کے لیے ہمہ وقت متحرک ہے وزیراعلیٰ پنجاب مریم نواز شریف کے وژن کے مطابق شاہرات کی حفاظت اور محفوظ سفر کو یقینی بنانے کے لیے مؤثر اقدامات جاری ہیں۔۔گڈز ٹرانسپورٹرز نے پٹرولنگ پولیس کی کارکردگی کو سراہتے ہوئے مکمل تعاون کی یقین دہانی کرائی۔دریں اثنا ڈی ایس پی پٹرولنگ ضلع لیہ میں عوامی ٹرانسپورٹ کے اڈہ منیجرز کو روڈ سیفٹی سے متعلق خصوصی بریفنگ دی گئی۔ ڈی ایس پی راؤ عمر فاروق نے انسانی جانوں کے تحفظ کو اولین ترجیح قرار دیتے ہوئے ٹریفک قوانین پر سختی سے عملدرآمد کی ہدایت کی۔ انہوں نے اڈہ منیجرز کو ہدایت کی کہ اپنے زیر انتظام ڈرائیورز کو تیز رفتاری، اوورلوڈنگ اور دوران ڈرائیونگ موبائل فون کے استعمال سے روکیں اور روڈ سیفٹی اصولوں پر عمل یقینی بنائیں۔ انہوں نے کہا کہ ٹریفک قوانین کی پابندی سے قیمتی انسانی جانوں کا تحفظ ممکن بنایا جا سکتا ہے۔
