لیہ(نمائندہ لیہ ٹی وی) ڈپٹی کمشنر آصف علی ڈوگر نے کہا ہے کہ اقلیتی برادری کے ہمہ قسمی حقوق کا تحفظ ہماری زمہ داری ہے۔ آئین پاکستان اقلیتی برادری کو عبادات کی مکمل آزادی فراہم کرتا ہے۔ حکومت پنجاب کے احکامات کی روشنی میں ضلعی انتظامیہ مسیحی برادری کو گڈ فرائیڈے اور ایسٹر کے موقع پر فول پروف سیکیورٹی اور دیگر سہولیات فراہم کرے گی اس سلسلہ میں تمام انتظامات مکمل کر لئے گئے ہیں۔ انہوں نے یہ بات ضلعی بین المذاہب ہم آہنگی کمیٹی کے اجلاس کی صدارت کرتے ہوئے کہی۔اجلاس میں ایڈیشنل ڈپٹی کمشنر جنرل شبیر احمد ڈوگر، ڈی ایس پیز حیات سرگانی، ظفر اقبال، جام سلیم، ڈی او انڈسٹری عاشق حسین، انچارج سیکورٹی برانچ یاسر گرمانی، سول ڈیفنس آفیسر توقیر عباس، ڈاکٹر یونس کلیہ، چیئرمین انجمن تاجران تنویر خان، بختو رام، سید ثقلین شاہ،نذر سوہن، ڈاکٹر شہزاد گل، راحت سہوترا، طارق سہوترا نے شرکت کی۔ڈپٹی کمشنر آصف علی ڈوگر نے متعلقہ محکموں کو ہدایت جاری کی کہ مسیحی عبادت گاہوں اور تقریبات کے مقامات پر فول پروف سیکیورٹی،صفائی کے بہترین انتظامات اور سہولیات کی بروقت فراہمی کو یقینی بنایا جائے تاکہ مسیحی برادری اپنے مذہبی تہوار پُرامن ماحول میں منا سکے۔ اجلاس میں مسیحی برادری کے نمائندگان اور کمیٹی کے ممبران نے ضلعی انتظامیہ کی جانب سے کیے گئے انتظامات کو سراہا اور اپنی تجاویز بھی پیش کیں۔ ڈپٹی کمشنر نے یقین دہانی کرائی کہ مسیحی برادری کے مذہبی تہواروں کے موقع پر تمام ضروری انتظامات کو ہر صورت مکمل کیا جائے گا اور بین المذاہب ہم آہنگی کے فروغ کے لیے عملی اقدامات جاری رکھے جائیں گے۔
