بھاگل نہر میں ڈوبنے والی 6 سالہ بچی کی لاش تین روزہ سرچ آپریشن کے بعد برآمد ریسکیو 1122 لیہ کی مسلسل جدوجہد کامیاب، 3.5 کلومیٹر دور سے ڈیڈ باڈی نکال کر ورثاء کے حوالے — والدین کو بچوں کو پانی کے قریب اکیلا نہ چھوڑنے کی ہدایت

لیہ (نمائندہ لیہ ٹی وی)بھاگل نہر میں گزشتہ دو روز قبل ڈوبنے والی 6 سالہ بچی کی ڈیڈ باڈی کو ریسکیو 1122 لیہ نے کامیاب سرچ آپریشن کے بعد برآمد کرکے ورثاء کے حوالے کر دیا۔تفصیلات کے مطابق بھاگل نہر میں بچی کے ڈوبنے کی اطلاع ملتے ہی ریسکیو 1122 لیہ نے فوری رسپانس دیتے ہوئے موقع پر پہنچ کر سرچ آپریشن شروع کر دیا۔ ریسکیو ٹیم کے ساتھ واٹر ریسکیو ٹیم نے انسیڈنٹ کمانڈ پوسٹ قائم کی، جبکہ غوطہ خوروں، ماہر سوئمرز اور بوٹس کی مدد سے نہر میں بھرپور سرچ آپریشن جاری رکھا گیا۔ریسکیو ٹیم نے دن رات مسلسل محنت اور پیشہ ورانہ مہارت کے ساتھ تین روز تک سرچ آپریشن جاری رکھا۔ تیسرے روز صبح جیسے ہی دوبارہ سرچ آپریشن شروع کیا گیا تو تقریباً 3.5 کلومیٹر کے فاصلے پر لائن سرچنگ کے دوران بچی کی ڈیڈ باڈی مل گئی، جسے ریسکیو ٹیم نے باحفاظت نکال کر ورثاء کے حوالے کر دیا۔یہ مکمل آپریشن ڈسٹرکٹ ایمرجنسی آفیسر ڈاکٹر سجاد احمد کی نگرانی میں انجام پایا، جنہوں نے موقع کا دورہ کیا اور سرچ آپریشن کا تفصیلی جائزہ بھی لیا۔ ریسکیو 1122 لیہ کی ٹیم نے بروقت اور مؤثر کارروائی کرتے ہوئے اپنی ذمہ داری بھرپور انداز میں نبھائی جس پر اہل علاقہ نے ریسکیو ٹیم کی کارکردگی کو سراہا۔ریسکیو حکام کے مطابق یہ واقعہ والدین کے لیے ایک اہم پیغام ہے کہ وہ اپنے بچوں کو پانی کے قریب اکیلا نہ چھوڑیں اور حفاظتی تدابیر پر خصوصی توجہ دیں تاکہ ایسے افسوسناک واقعات سے بچا جا سکے۔