لیہ(نمائندہ لیہ ٹی وی)ڈپٹی کمشنر آصف علی ڈوگر نے عیدالفطر کے موقع پر صفائی کے بہترین انتظامات پر ڈی ڈبلیو ایم سی کے افسران میں اعزازی شیلڈز اور اسناد تقسیم کیں۔ اس موقع پر ایڈیشنل ڈپٹی کمشنر جنرل شبیر احمد ڈوگر بھی موجود تھے۔ڈپٹی کمشنر نے ریجنل منیجر لیہ مدثر جاوید، ڈسٹرکٹ منیجر خوشحال خان بزدار،تحصیل منیجرز دانیال فیض، قدرت اللہ، فیصل نیاز،سکندر ابراہیم میں اعزازی شیلڈز اور اسناد تقسیم کیں۔ڈپٹی کمشنر آصف علی ڈوگر نے اس موقع پر کہا کہ وزیراعلیٰ پنجاب مریم نواز شریف کی ہدایت پر صوبہ بھر میں صفائی کے نظام کو مزید بہتر بنایا جا رہا ہے اور ستھرا پنجاب مہم ایک مؤثر اور انقلابی اقدام ہے جس کی ماضی میں مثال نہیں ملتی۔انہوں نے کہا کہ عیدالفطر کے موقع پر شہریوں کو صاف ستھرا ماحول فراہم کرنے کے لیے خصوصی صفائی پلان تشکیل دیا گیا جس پر ڈی ڈبلیو ایم سی کی ٹیم نے ذمہ داری اور محنت کے ساتھ عملدرآمد کیا۔انہوں نے کہا کہ عید کے دنوں میں مساجد، عید گاہوں، مرکزی شاہراہوں، بازاروں اور رہائشی علاقوں میں صفائی کے بہترین انتظامات کو یقینی بنایا گیا جس سے شہریوں کو خوشگوار ماحول میسر آیا۔انہوں نے افسران و عملہ کی کارکردگی کو سراہتے ہوئے کہا کہ فیلڈ ٹیموں نے بروقت صفائی،ویسٹ کلیکشن اور عمومی صفائی ستھرائی کے عمل کو احسن انداز میں جاری رکھا جو قابل تحسین ہے۔ڈپٹی کمشنر نے ہدایت کی کہ صفائی کے اس معیار کو برقرار رکھا جائے شہریوں کو صاف ماحول کی فراہمی ضلعی انتظامیہ کی اولین ترجیح ہے اور اس مقصد کے لیے تمام دستیاب وسائل بروئے کار لائے جا رہے ہیں جبکہ عوام میں صفائی کے حوالے سے شعور اجاگر کرنا بھی نہایت ضروری ہے تاکہ یہ عمل مستقل بنیادوں پر جاری رہ سکے۔ڈپٹی کمشنر نے ڈی ڈبلیو ایم سی کے افسران و عملہ کی خدمات کو سراہتے ہوئے اس امید کا اظہار کیا کہ وہ آئندہ بھی اسی جذبے اور محنت کے ساتھ اپنی ذمہ داریاں ادا کرتے رہیں گے اور ضلع میں صفائی کے نظام کو مزید بہتر بنانے میں اپنا مؤثر کردار جاری رکھیں گے۔
