ڈی پی ایس بوائز لیہ میں نئی قیادت، عثمان رشید بطور پرنسپل تعینات ڈپٹی کمشنر آصف علی ڈوگر کا تعلیمی معیار بہتر بنانے اور جدید تقاضوں سے ہم آہنگ کرنے کی ہدایت

لیہ(نمائندہ لیہ ٹی وی)ڈسٹرکٹ پبلک سکول بوائز میں پرنسپل کی تبدیلی کی تقریب منعقد ہوئی۔ چیئرمین بورڈ آف گورنرز ڈی پی ایس/ڈپٹی کمشنر آصف علی ڈوگر تقریب کے مہمان خصوصی تھے۔ اس موقع پر سیکرٹری بی او جی/اے ڈی سی جی شبیر احمد ڈوگر، اسسٹنٹ کمشنر زوہیب کریم، سابق پرنسپل اکرم جاوید بھی موجود تھے۔ اس موقع پر عثمان رشید کو نئے پرنسپل ڈسٹرکٹ پبلک سکول کا چارج دیا گیا۔ڈپٹی کمشنر آصف علی ڈوگر نے اس موقع پر کہا کہ تعلیمی اداروں میں معیاری تعلیم کی فراہمی حکومت پنجاب کی اولین ترجیحات میں شامل ہے اور ڈسٹرکٹ پبلک سکول اس سلسلے میں ایک نمایاں ادارہ ہے۔انہوں نے کہا کہ سکول میں موجود بہتر تعلیمی ماحول کو مزید مؤثر اور نتیجہ خیز بنایا جائے تاکہ طلبہ کو بہترین تعلیمی سہولیات میسر آئیں۔انہوں نے کہا کہ تدریسی معیار کو جدید تقاضوں سے ہم آہنگ کیا جائے اور اساتذہ اپنی پیشہ ورانہ صلاحیتوں کو بروئے کار لاتے ہوئے طلبہ کی ہمہ جہت تربیت پر خصوصی توجہ دیں صفائی ستھرائی کے نظام کو مزید بہتر اور برقرار رکھا جائے جبکہ کھیلوں اور ہم نصابی سرگرمیوں کو فروغ دے کر طلبہ کی صلاحیتوں کو نکھارا جائے۔انہوں نے کہا کہ حکومت پنجاب کی جاری تعلیمی اصلاحات اور پالیسیوں پر مکمل عملدرآمد کو یقینی بنایا جائے تاکہ ادارے کی کارکردگی میں مزید بہتری آئے اور یہ تعلیمی میدان میں اپنی نمایاں حیثیت برقرار رکھ سکے۔تقریب کے اختتام پر ڈپٹی کمشنر آصف علی ڈوگر نے نئے پرنسپل عثمان رشید کے لیے نیک خواہشات کا اظہار کیا اور انہیں خوش آمدید کہا۔