لیہ(نمائندہ لیہ ٹی وی)ڈپٹی کمشنر آصف علی ڈوگر کا شہر میں مختلف جاری ترقیاتی سکیموں کا دورہ۔ ڈپٹی کمشنر نے منظور پارک اور لاری اڈا میں جاری کام کا معائنہ کیا۔ ایڈیشنل ڈپٹی کمشنر جنرل شبیر احمد ڈوگر اور میونسپل آفیسر انفراسٹرکچر ساجد گشکوری ان کے ہمراہ تھے۔ ڈپٹی کمشنر نے منظور پارک میں سپورٹس ارینا کے تعمیراتی کام کا جائزہ لیا۔ انہوں نے ہدایت کی کہ کام کو اعلی معیار کے ساتھ بروقت مکمل کیا جائے تاکہ شہری سپورٹس کی سہولت سے مستفید ہو سکیں۔ ڈپٹی کمشنر نے جنرل بس سٹینڈ کا بھی دورہ کیا۔ انہوں نے لاری اڈا کے شیڈز کی سٹیٹ آف دی آرٹ تعمیر، تزئین و آرائش اور ٹف ٹائلز کے لئے اقدامات کا جائزہ لیا۔ ڈپٹی کمشنر نے کہا کہ لاری اڈا کسی بھی شہر کے معاشی سرگرمیوں کے لئے بنیادی کردار ادا کرتا ہے اور اس کی بہترین ڈیزائننگ سے تعمیر وقت کا ناگزیر تقاضا ہے۔ انہوں نے کہا کہ لاری اڈا میں نئے شیڈز، ٹف ٹائلز سے ایک خوشگوار تبدیلی آئے گی اور نظم و ضبط کے علاوہ صفائی کے معیار کو بھی برقرار رکھا جا سکے گا۔ ڈپٹی کمشنر نے ہدایت کی کہ بس سٹینڈ میں تجاوزات کا خاتمہ کیا جائے اور پانی کے نکاس کے لئے بہترین نظام بنایا جائے۔
