ڈپٹی کمشنر آصف علی ڈوگر کی زیر صدارت ٹرانسپورٹرز نمائندگان کا اجلاس، عوام کو محفوظ اور سہل سفری سہولیات کی فراہمی اور مقررہ کرایوں پر عملدرآمد کے حوالے سے غور و خوض

لیہ(نمائندہ جنگ)ڈپٹی کمشنر آصف علی ڈوگر کی زیر صدارت ٹرانسپورٹرز نمائندگان کا اجلاس منعقد ہوا۔ اجلاس میں سیکرٹری آر ٹی اے/اے ڈی سی جی شبیر احمد ڈوگر و دیگر موجود تھے۔اجلاس میں عیدالفطر کے موقع پر عوام کو محفوظ اور سہل سفری سہولیات کی فراہمی اور مقررہ کرایوں پر عملدرآمد کے حوالے سے غور و خوض کیاگیا۔ڈپٹی کمشنر آصف علی ڈوگر نے اجلاس سے خطاب کرتے ہوئے کہا کہ عیدالفطر کے قریب آتے ہی بیرون اضلاع اور دیگر شہروں سے بڑی تعداد میں لوگ اپنے آبائی علاقوں کا رخ کرتے ہیں اس موقع پر ٹرانسپورٹرز کی ذمہ داری ہے کہ وہ عوام کو بہترین سفری سہولیات فراہم کریں اور کسی بھی صورت مقررہ کرایوں سے زائد وصولی نہ کریں۔ انہوں نے واضح کیا کہ زائد کرایہ وصول کرنے والے ٹرانسپورٹرز کے خلاف سخت قانونی کارروائی عمل میں لائی جائے گی۔انہوں نے مزید ہدایت کی کہ مسافروں کی جان و مال کے تحفظ کو یقینی بنانے کے لیے گاڑیوں کی چھتوں پر سواریاں بٹھانے سے مکمل اجتناب کیا جائے کیونکہ اس عمل سے حادثات کا خطرہ بڑھ جاتا ہے۔م ٹرانسپورٹرز اس حوالے سے ذمہ داری کا مظاہرہ کریں اور حکومتی ہدایات پر مکمل عملدرآمد کو یقینی بنائیں۔ڈپٹی کمشنر نے کہا کہ وزیر اعلی پنجاب کی ہدایات کے مطابق عید کے موقع پر اپنے پیاروں کے پاس آنے والے مسافروں کو ہر ممکن سہولت فراہم کی جائے گی اور ان کے ساتھ کسی قسم کی زیادتی برداشت نہیں کی جائے گی۔ انہوں نے کہا کہ ضلعی انتظامیہ عید کے دنوں میں ٹرانسپورٹ کرایوں اور مسافروں کی سہولت کے حوالے سے مانیٹرنگ کو مزید مؤثر بنائے گی تاکہ عوام کو کسی مشکل کا سامنا نہ کرنا پڑے۔