لیہ(نمائندہ لیہ ٹی وی)چیئرمین پنجاب سہولت بازار اتھارٹی ایم این اے ملک محمد افضل کھوکھر نے ضلع لیہ میں 4 سہولت آن دا گو بازاروں کا افتتاح کر دیا۔ چیئرمین اتھارٹی محمد افضل کھوکھر نے اپنے دورہ ضلع لیہ کے موقع پر لیہ، کروڑ، فتح پور اور چوک اعظم میں قائم سہولت آن دا گو بازاروں کا باقاعدہ افتتاح کریا۔اس موقع پر ایم پی اے سمعیہ عطاء شہانی، ڈپٹی کمشنر آصف علی ڈوگر، سابق پارلیمنٹرینز ثقلین شاہ بخاری، عبدالشکور سواگ، لالہ طاہر رندھاوا، ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنرز زوہیب کریم، اصغر علی چیمہ، صدر انجمن تاجران محمد اظہر ہانس، چیئرمین حاجی تنویر احمد خان، لیگی رہنما ملک عثمان علی اولکھ، ظفر اقبال گجر، ایڈووکیٹ عبد الرؤف گجر سمیت دیگر متعلقہ افسران ہمراہ تھے۔چیئرمین پنجاب سہولت بازار اتھارٹی ملک محمد افضل کھوکھر نے میڈیا سے گفتگو کرتے ہوئے کہا کہ وزیر اعلیٰ پنجاب مریم نواز شریف کے وژن کے مطابق صوبہ بھر میں چھوٹے کاروباری افراد کو باعزت روزگار کے مواقع فراہم کرنے کیلئے سہولت آن دا گو بازار قائم کئے جا رہے ہیں جس کے نتیجہ میں ریڑھی بان باقاعدہ دکاندار بن کر باعزت روزگار حاصل کر رہے ہیں۔ انہوں نے کہا کہ ان بازاروں میں دکانداروں کو کاروبار کیلئے مناسب جگہ فراہم کی گئی ہے جبکہ شہریوں کو پر سکون ماحول میں کم قیمت پر معیاری اشیائے ضروریہ دستیاب ہیں۔انہوں نے کہا کہ سہولت آن دا گو بازاروں میں دکانداروں کو بجلی اور سیکورٹی جیسی بنیادی سہولیات بھی فراہم کی جا رہی ہیں جبکہ دکان کا ماہانہ کرایہ صرف پانچ ہزار روپے مقرر کیا گیا ہےتاکہ زیادہ سے زیادہ چھوٹے تاجر اس سہولت سے فائدہ اٹھا سکیں۔ انہوں نے کہا کہ ایسے منصوبے نہ صرف عوام کو ریلیف فراہم کر رہے ہیں بلکہ شہروں کے نظم و نسق اور خوبصورتی میں بھی اضافہ کا باعث بن رہے ہیں سہولت آن دا گو بازاروں میں اشیائے خوردونوش مناسب قیمت اور بہتر معیار کے ساتھ دستیاب ہیں جس سے شہریوں کو براہ راست فائدہ پہنچ رہا ہے۔ انہوں نے ضلع لیہ میں جاری انتظامی اقدامات کو سراہتے ہوئے کہا کہ یہاں ترقی اور بہتری کے واضح آثار نظر آ رہے ہیں جبکہ فوڈ سٹریٹ اور سپورٹس کمپلیکس سمیت مختلف منصوبوں کو دیکھ کر خوشگوار تبدیلی محسوس ہوئی ہے۔اس موقع پر چیئرمین پنجاب سہولت بازار اتھارٹی نے بازار کے مختلف سٹالز کا معائنہ کیا اور اشیائے ضروریہ کے معیار اور قیمتوں کا جائزہ لیا جبکہ دکانداروں سے گفتگو کرتے ہوئے ان کے مسائل بھی دریافت کئے۔ انہوں نے ضلع لیہ کی ری شیپنگ اور ری سٹرکچرنگ میں ڈپٹی کمشنر آصف علی ڈوگر اور ان کی ٹیم کی کاوشوں کو قابل ستائش قرار دیا اور کہا کہ ضلعی انتظامیہ کی محنت سے عوام کو بہتر سہولیات فراہم کی جا رہی ہیں۔
