ضلع لیہ میں اشیائے خوردونوش کی نئی ریٹ لسٹ جاری، چاول، دالیں، گوشت، دودھ، آٹا اور روٹی کے نرخ مقرر، تاجرتنظیموں سے مشاورت کے بعد نوٹیفکیشن نافذ، مقررہ قیمتوں پر عملدرآمد کی ہدایت

لیہ(نمائندہ لیہ ٹی وی )ڈپٹی کمشنر/کنٹرولر پرائسز اینڈ سپلائز نے ضلع لیہ میں اشیائے خوردونوش کی نئی ریٹ لسٹ جاری کر دی۔ تاجرتنظیموں کی باہمی مشاورت سے اشیائے ضروریہ کی قیمتوں کا ازسرنو تعین کیا گیا اور نئی قیمتوں کا اطلاق فوری طور پر نافذ العمل ہوگا۔ اس سلسلہ میں ایڈیشنل ڈپٹی کمشنر جنرل شبیر احمد ڈوگر کی زیر صدارت اجلاس منعقد ہوا جس میں باہمی مشاورت سے نرخ نامہ جاری کیا گیا۔جاری کردہ نرخ نامہ کے مطابق چاول کائنات (نیا) 310 روپے فی کلو، چاول کائنات (پرانا) 320 روپے فی کلو، چاول ایری نمبر 6 ایک سو روپے فی کلو مقرر کیے گئے ہیں۔ اسی طرح دال چنا موٹی 220 روپے فی کلو، دال چنا باریک 205 روپے فی کلو، سفید چنا موٹا 265 روپے فی کلو، سفید چنا باریک 215 روپے فی کلو، دال مسور موٹی 200 روپے فی کلو، دال ماش دھلی 370 روپے فی کلو، دال مونگ دھلی 340 روپے فی کلو جبکہ بیسن 210 روپے فی کلو مقرر کیا گیا ہے۔ نوٹیفکیشن کے مطابق دودھ 160 روپے فی لیٹر، دہی 180 روپے فی کلو فروخت ہوگا۔ روٹی 100 گرام 14 روپے جبکہ نان سادہ 120 گرام 20 روپے مقرر کیا گیا ہے۔ گوشت کے نرخوں میں چھوٹا گوشت 1600 روپے اور بڑا گوشت 800 روپے فی کلو مقرر کیا گیا ہے۔ آٹا تھیلا 10 کلوگرام 905 روپے اور آٹا تھیلا 20 کلوگرام 1810 روپے مقرر کیا گیا ہے۔ چینی حکومت پنجاب کے جاری کردہ نرخ کے مطابق فروخت کی جائے گی جبکہ گھی اور کوکنگ آئل کمپنی کے پرنٹ ریٹ پر دستیاب ہوں گے۔ سبزیوں اور پھلوں کے نرخ روزانہ کی بنیاد پر مقرر کیے جائیں گے۔ایڈیشنل ڈپٹی کمشنر جنرل شبیر احمد ڈوگر نے اجلاس سے خطاب کرتے ہوئے کہا کہ پرائس کنٹرول میکنزم کو مزید مؤثر بنایا جا رہا ہے تاکہ عوام کو اشیائے ضروریہ مقررہ نرخوں پر دستیاب ہوں۔انہوں نے ہدایت کی کہ تمام دکاندار نرخ نامہ نمایاں جگہ پر آویزاں کریں اور مقررہ قیمتوں کی پابندی یقینی بنائیں۔اجلاس میں ڈی او انڈسٹری عاشق حسین، اسسٹنٹ ڈائریکٹر مارکیٹنگ عمران ستار، سیکرٹری مارکیٹ کمیٹی سید عمران شہزاد،غلام معین الدین،سید عمران شاہ و دیگر موجود تھے۔