لیہ میں پنجاب فوڈ اتھارٹی کی بڑی کارروائیاں، 10 فوڈ پوائنٹس کو دو لاکھ سے زائد جرمانے، 60سے زائد فوڈ پوائنٹس کی چیکنگ، 400 لیٹر غیر معیاری دودھ اور 60 کلو ایکسپائرڈ اشیاء تلف، 32 فوڈ بزنس آپریٹرز کو وارننگ نوٹسز جاری

لیہ(نمائندہ لیہ ٹی وی)عوام تک معیاری خوراک پہنچانے کا مشن جاری، فوڈ سیفٹی ٹیموں کی بڑی کارروائی، لیہ میں پنجاب فوڈ اتھارٹی کی ٹیموں نے شہر کے فوڈ بزنس پوائنٹس پر کڑی چیکنگ کے دوران متعدد غیر معیاری اور ایکسپائرڈ اشیاء برآمد کیں اور شہریوں کی صحت و سلامتی کو تحفظ فراہم کرنے کے لیے کارروائی کی۔تفصیلات کے مطابق فوڈ سیفٹی ٹیموں نے لیہ شہر کے 60 سے زائد فوڈ پوائنٹس کا معائنہ کیا۔ معائنہ کے دوران 32 فوڈ بزنس آپریٹرز کو معیار میں بہتری کے لیے وارننگ نوٹسز جاری کیے گئے جبکہ 10 فوڈ پوائنٹس پر غیر معیاری اور ایکسپائرڈ اشیاء بیچنے پر دو لاکھ روپے سے زائد جرمانے عائد کیے گئے۔ کارروائی کے دوران تقریباً 400 لیٹر غیر معیاری دودھ اور 60 کلو ایکسپائرڈ فوڈ اشیاء تلف کر دی گئیں۔ڈپٹی ڈائریکٹر پنجاب فوڈ اتھارٹی وقار الحسن بودلہ نے اس موقع پر کہا کہ عوام تک ملاوٹ سے پاک اور معیاری خوراک پہنچانا ہماری اولین ذمہ داری ہے۔ انہوں نے واضح کیا کہ ہر غیر معیاری فوڈ بزنس آپریٹر کے خلاف قانون کے مطابق کارروائی کی جائے گی اور شہری کسی بھی ناخالص یا مشکوک خوراک کی شکایت فوری طور پر نمبر1223 پر درج کروائیں۔ڈپٹی ڈائریکٹر پنجاب فوڈ اتھارٹی وقار الحسن بودلہ نے شہریوں سے اپیل کی کہ وہ اپنی صحت اور حفاظت کے لیے کسی بھی غیر معیاری خوراک کو نظرانداز نہ کریں اور فوری طور پر اطلاع دیں تاکہ فوری کارروائی کی جا سکے۔اس کارروائی سے نہ صرف شہر میں فوڈ سیفٹی کے معیار کو بلند کرنے میں مدد ملی بلکہ عوامی صحت کے تحفظ کے حوالے سے پنجاب فوڈ اتھارٹی کی کارکردگی کا عملی مظاہرہ بھی سامنے آیا۔