وزیر اعلیٰ کے وژن پر ”ایک دن ایک تحصیل“ مہم کا آغاز، لیہ میں بڑے پیمانے پر صفائی و بہتری آپریشن شروع، ڈی سی آصف علی ڈوگر کا کشمیر چوک سے افتتاح، 2 ہزار ورکرز متحرک، گرین بیلٹس، پارکس، سٹریٹ لائٹس، فلٹریشن پلانٹس کی بحالی، تجاوزات کے خاتمے اور غیر قانونی پیٹرول پمپ سیل کرنے کی کارروائیاں، مہم تمام تحصیلوں تک پھیلانے کا اعلان

لیہ(نمائندہ لیہ ٹی وی)وزیر اعلیٰ پنجاب مریم نواز شریف کے وژن کے مطابق ایک دن ایک تحصیل عوامی سہولیات بہتری مہم کا آغاز کر دیا گیا۔ شہر بھر میں متعلقہ محکموں کی طرف سے خصوصی آپریشن جاری۔ ضلعی انتظامیہ کے زیر اہتمام ایک دن ایک تحصیل مہم کے تحت ڈپٹی کمشنر لیہ آصف علی ڈوگر کی ہدایت پر شہر میں صفائی کی صورتحال بہتر بنانے اور عوام کو صاف ستھرا ماحول فراہم کرنے، گرین بیلٹس، پارکوں کی تزئین و آرائش،سٹریٹ لائٹس و واٹر فلٹریشن پلانٹس کی بحالی،سکولوں، کالجوں، ہسپتالوں، سرکاری دفاتر، گلی محلوں،بس اڈوں کی صفائی، بجلی کی جھولتی تاروں کی درستی، پرائس و ڈویلپمنٹ سکیموں کا معائنہ،عارضی تجاوزات کے خاتمے، مین ہولز کی تنصیب، صاف پانی کی فراہمی، غیر قانونی پیٹرول پمپ و ایل پی جی دکانوں کو سیل کرنے کے لئے مہم کا آغاز کر دیا گیا۔ ڈپٹی کمشنر نے کشمیر چوک لیہ سے مہم کا افتتاح کیا۔ اس سلسلے میں میونسپل کمیٹی لیہ، ویسٹ مینجمنٹ کمپنی، واسا، ضلع کونسل، لوکل گورنمنٹ اور دیگر متعلقہ اداروں کی ٹیمیں متحرک ہو گئیں اور مختلف علاقوں میں خصوصی آپریشن شروع کر دیا گیا۔ ڈپٹی کمشنر آصف علی ڈوگر نے اس موقع پر گفتگو کرتے ہوئے کہا کہ مہم کے دوران 2 ہزار کے لگ بھگ ورکرز خدمات انجام دیں گے اور گلی محلوں، بازاروں، سرکاری دفاتر اور عوامی مقامات حتیٰ کہ یونین کونسل سطح تک سے کوڑا کرکٹ اٹھایا جائے گا جبکہ سیوریج، نالوں کی صفائی، پانی کے چھڑکاؤ اور جھاڑو مہم بھی سارا دن جاری رہے گی۔ انہوں نے کہا کہ اس دوران پرائس کنٹرول مجسٹریٹس، سول ڈیفنس، پیرا، محکمہ انہار، ہائی وے، ایگریکلچر، سکول ایجوکیشن، کالجز، ویٹرنری و دیگر محکمے اپنے متعلقہ فرائض بھی انجام دیں گے۔ ڈپٹی کمشنر نے کہا ہے کہ صفائی نصف ایمان ہے اور اس میں عوام کا تعاون ضروری ہے۔ڈپٹی کمشنر آصف علی ڈوگر نے شہریوں سے اپیل کی کہ وہ کوڑا کرکٹ مقررہ مقامات پر ڈالیں اور صفائی عملے کے ساتھ تعاون کریں تاکہ شہر کو مستقل بنیادوں پر صاف اور خوبصورت بنایا جا سکے۔ ڈپٹی کمشنر آصف علی ڈوگر نے کہا کہ وزیر اعلیٰ پنجاب مریم نواز شریف کے وژن کے مطابق ضلع بھر کی تمام تحصیلوں میں سلسلہ وار تمام محکموں کو متحرک کیا گیا ہے اور یہ مسلسل عمل جاری رہے گا تاکہ عوام کو متعلقہ سروسز سے مستفید کیا جا سکے۔ انہوں نے بتایا کہ تحصیل لیہ کے شہروں چوک اعظم اور کوٹ سلطان میں بھی صفائی مہم کا آغاز کیا گیا ہے کل تحصیل کروڑ لعل عیسن اور ہفتہ کے روز تحصیل چوبارہ میں اسی طرز پر مہم چلائی جائے گی۔ ڈپٹی کمشنر نے کہا کہ تمام محکمے ان بورڈ ہیں اور ان کی کارکردگی کو فزیکلی اور ڈیش بورڈ پر مانیٹر کیا جائے گا۔دریں اثناء ایڈیشنل ڈپٹی کمشنر ریونیو محمد شاہد ملک نے یونین کوٹ سلطان جبکہ اسسٹنٹ کمشنر لیہ زوہیب کریم نے چوک اعظم شہر میں مہم کا معائنہ کیا۔