لیہ(لیہ ٹی وی)وزیراعلی پنجاب مریم نوازشریف کے احکامات اور ڈپٹی کمشنر امیرابیدار کی ہدایت پرکپاس کی زیادہ پیداوار حاصل کرنے کے لیے محکمہ زراعت کوشاں ہے۔اس سلسلہ میں محکمہ زراعت توسیع کے زیر اہتمام”کپاس کی بحالی، پاکستان کی خوشحالی “کے عنوان سے یونین کونسل فتح پورچک نمبر106ایم ایل تیلدار اجناس کی اہمیت، کپاس کی اگیتی کاشت اور پیداوار میں اضافے کے حوالے سے ایک میگا فارمر گیڈرنگ کا انعقاد کیا گیاجس کا مقصد جدید زرعی تکنیکوں کو فروغ دینا، بیماریوں سے تحفظ کے عملی حل فراہم کرنا اور کپاس کی بحالی کے ذریعے ملکی معیشت کو مستحکم بنانا تھا۔اس موقع پرڈپٹی ڈائریکٹر پلانٹ پروٹیکشن اعجاز احمد قیصرانی، اسسٹنٹ ڈائریکٹر زراعت کروڑ شہباز حسین کھوکھر، اسسٹنٹ ڈائریکٹر زراعت کروڑ ڈاکٹر عمران فراز بھٹی، اورسینر زراعت آفیسر فتح پور محمد بخش کھوکھر نے کسانوں کو جدید ٹیکنالوجی، فصلوں کی بہتر نگہداشت اور پیداوار میں اضافے کے حوالے سے آگاہی فراہم کی۔ ماہرین نے اس بات پر زور دیا کہ کپاس پاکستان کی معیشت میں ریڑھ کی ہڈی کی حیثیت رکھتی ہے، اور اس کی بحالی نہ صرف کسانوں کی خوشحالی بلکہ ملکی اقتصادی ترقی کے لیے بھی ناگزیر ہے زراعت ماہرین نے کسانوں کو جدید زرعی پالیسیوں اور کسان پیکج کے تحت فراہم کردہ مواقع کے بارے میں تفصیلی بریفنگ دی۔اس موقع پر کسانوں کی کثیر تعداد نے شرکت کی اور حکومتی اقدامات کو سراہا۔ کسانوں نے اس عزم کا اظہار کیا کہ جدید سائنسی طریقوں کو اپنا کر وہ پیداوار میں اضافے اور ملکی ترقی میں اپنا کردار ادا کریں گے
