حکومت اور پی ٹی آئی مذاکرات: اسپیکر قومی اسمبلی نے 28 جنوری کو اجلاس طلب کر لیا

اسلام آباد (لیہ ٹی وی) اسپیکر قومی اسمبلی نے حکومت اور پاکستان تحریک انصاف (پی ٹی آئی) کی مذاکراتی کمیٹیوں کا اجلاس 28 جنوری کو طلب کر لیا ہے۔
حکومتی مذاکراتی کمیٹی کے ترجمان عرفان صدیقی کا کہنا ہے کہ پی ٹی آئی کو اجلاس میں شرکت کی دعوت دی گئی ہے، تاہم تحریک انصاف نے ابھی تک شرکت سے معذرت نہیں کی اور نہ ہی مذاکرات ختم کرنے کے حوالے سے کوئی تحریری اطلاع دی ہے۔ عرفان صدیقی نے مزید کہا کہ حکومت نے مذاکرات ختم نہیں کیے، اور پی ٹی آئی کو اجلاس میں شریک ہو کر حکومتی موقف سننے کی دعوت دی ہے۔
دوسری جانب، پی ٹی آئی کے چیئرمین بیرسٹر گوہر نے اعلان کیا ہے کہ تحریک انصاف 28 جنوری کو ہونے والے مذاکراتی اجلاس میں شرکت نہیں کرے گی۔
یاد رہے کہ پی ٹی آئی کے بانی اور سابق وزیر اعظم عمران خان نے گزشتہ روز حکومت کے ساتھ جاری مذاکرات کو ختم کرنے کا اعلان کیا تھا۔ اڈیالہ جیل کے باہر میڈیا سے گفتگو کرتے ہوئے بیرسٹر گوہر نے کہا تھا کہ حکومت نے جوڈیشل کمیشن کے قیام میں تاخیر کی، جس کے باعث مذاکرات کا سلسلہ ختم کرنا پڑا۔
انہوں نے مزید کہا کہ حکومت کی جانب سے تعاون نہ ملنے پر بات چیت ممکن نہیں رہی، اور پی ٹی آئی نے مذاکرات میں شامل نہ ہونے کا حتمی فیصلہ کر لیا ہے۔