سیاسی سرگرمیوں میں ملوث 2 خواتین سمیت 3 اساتذہ معطل، محکمہ تعلیم پنجاب کا سخت اقدام

اٹک(لیہ ٹی وی)محکمہ تعلیم پنجاب نے سیاسی سرگرمیوں میں ملوث 2 خواتین سمیت 3 اساتذہ کو معطل کر دیا ہے۔ یہ کارروائی سوشل میڈیا پر توہین آمیز ریمارکس اور سیاسی سرگرمیوں میں شمولیت کی شکایات پر کی گئی۔
محکمہ تعلیم کے جاری کردہ نوٹیفکیشن کے مطابق معطل کیے گئے اساتذہ حضرو اور جنڈ کے اسکولوں میں تعینات تھے۔ نوٹیفکیشن میں کہا گیا ہے کہ معطل خواتین اساتذہ کو فوری طور پر ڈپٹی ڈسٹرکٹ آفیسر ابتدائی تعلیم، اٹک میں رپورٹ کرنے کی ہدایت کی گئی ہے۔
محکمہ تعلیم نے واضح کیا ہے کہ سرکاری ملازمین کا سیاسی سرگرمیوں میں ملوث ہونا قوانین کی خلاف ورزی ہے اور اس قسم کے اقدامات برداشت نہیں کیے جائیں گے۔ اس کارروائی کو نظم و ضبط کی بحالی کی کوشش کے طور پر دیکھا جا رہا ہے۔