لیہ: 11ویں تھل جیپ ریلی 5 نومبر کو منعقد ہوگی جبکہ اس کے مڈ پوائنٹ رکھ خیرے والا میں 5 سے 8 نومبر تک چار روزہ ثقافتی میلہ سجایا جائے گا۔ میگا ایونٹ میں عوام کی بھرپور شرکت یقینی بنانے کے لیے فری پبلک ٹرانسپورٹ چلانے کا فیصلہ کیا گیا ہے۔یہ فیصلہ ڈپٹی کمشنر آصف علی ڈوگر کی زیر صدارت تھل جیپ ریلی اور لیہ تھل میلہ کے انتظامات کے جائزہ اجلاس میں کیا گیا۔ اجلاس میں ایڈیشنل ڈپٹی کمشنرز شبیر احمد ڈوگر، اویس سرور اور خضر ظہور، اسسٹنٹ کمشنرز زوہیب کریم، ذوالفقار صابر اور اصغر علی سمیت ضلعی محکموں کے سربراہان اور دیگر متعلقہ شخصیات نے شرکت کی۔اجلاس میں بتایا گیا کہ چار روزہ میلے کے دوران میوزیکل نائٹ، آتش بازی، فوڈ اسٹریٹ، کلچرل ڈانس، اونٹ و گھوڑا ڈانس، کبڈی، دیسی کشتی، نیزہ بازی، تیر اندازی، والی بال، رسہ کشی اور سرکس سمیت مختلف ثقافتی، کھیلوں اور تفریحی پروگرامز منعقد ہوں گے۔ڈپٹی کمشنر آصف علی ڈوگر نے کہا کہ تھل جیپ ریلی اور لیہ تھل میلہ ضلع لیہ کی عالمی سطح پر شناخت کا اہم ایونٹ بن چکا ہے، جسے یادگار بنانے کے لیے تمام متعلقہ ادارے مربوط حکمت عملی اور ٹیم ورک کے تحت اپنی ذمہ داریاں انجام دیں۔انہوں نے کہا کہ عوام اور سیاحوں کو متوجہ کرنے کے لیے تھل جیپ ریلی اور ثقافتی میلے کو تفریح اور ثقافت کے بہترین امتزاج کے طور پر پیش کیا جائے تاکہ پاکستان کے مثبت اور پُرامن تشخص کو اجاگر کیا جا سکے۔ڈپٹی کمشنر نے متعلقہ محکموں کو صفائی ستھرائی، ٹریفک مینجمنٹ، سکیورٹی، پارکنگ، پبلک ٹرانسپورٹ، صحت، ریسکیو اور دیگر ضروری سہولیات کے جامع انتظامات یقینی بنانے کی ہدایت کی۔ انہوں نے کہا کہ تھل جیپ ریلی، پنڈال، محکموں کے اسٹالز، شرکاء اور سیاحوں کو بہترین سہولیات کی فراہمی کے لیے تمام ادارے باہمی رابطے کے ساتھ کام کریں اور تمام انتظامات مقررہ وقت سے قبل مکمل کیے جائیں۔
