لیہ: ڈپٹی کمشنر لیہ آصف علی ڈوگر نے گزشتہ رات ہونے والی شدید بارش کے بعد بارشی پانی کی نکاسی کے عمل کی نگرانی کے لیے مختلف علاقوں اور ڈسٹرکٹ ہیڈکوارٹر ہسپتال لیہ کا معائنہ کیا۔ اس موقع پر ایڈیشنل ڈپٹی کمشنر سوشل سروسز خضر ظہور اور اسسٹنٹ کمشنر زوہیب کریم بھی ان کے ہمراہ تھے۔ڈپٹی کمشنر نے مختلف مقامات پر موجود رہ کر متعلقہ افسران کو ضروری ہدایات جاری کیں۔ انہوں نے کہا کہ بارش کے بعد جمع ہونے والے پانی کی فوری نکاسی کے لیے ڈسپوزل ورکس فعال کر دیے گئے ہیں جبکہ متعلقہ محکموں کا عملہ مشینری سمیت فیلڈ میں موجود ہے اور بارشی پانی تیزی سے نکالا جا رہا ہے۔آصف علی ڈوگر نے ہدایت کی کہ نکاسی آب کے عمل کی مسلسل نگرانی کی جائے، ڈسپوزل ورکس کو بلا تعطل فعال رکھا جائے اور تمام دستیاب وسائل بروئے کار لاتے ہوئے شہریوں کو فوری ریلیف فراہم کیا جائے۔ انہوں نے آمدورفت کو ہر ممکن حد تک معمول پر رکھنے کی بھی ہدایت کی۔ڈپٹی کمشنر نے واضح کیا کہ نکاسی آب کے کام میں کسی قسم کی غفلت یا غیر ضروری تاخیر برداشت نہیں کی جائے گی۔ تمام متعلقہ ادارے باہمی رابطے کے ساتھ ذمہ داری سے فرائض انجام دیتے ہوئے بارشی پانی کی بروقت نکاسی یقینی بنائیں۔انہوں نے تمام اسسٹنٹ کمشنرز، چیف آفیسر اور واسا حکام کو نکاسی آب کا عمل مکمل ہونے تک فیلڈ میں متحرک رہنے کی ہدایت کی۔بعد ازاں ڈپٹی کمشنر نے ڈی ایچ کیو ہسپتال میں طوفان کے باعث زخمی ہونے والے مریضوں کی عیادت کی اور ہسپتال انتظامیہ کو زخمیوں کو بہترین طبی سہولیات فراہم کرنے کے احکامات جاری کیے۔
