لیہ: ڈپٹی کمشنر آصف علی ڈوگر سے نئے تعینات ہونے والے چیف ایگزیکٹو آفیسر تعلیم عبدالحفیظ اور سول ڈیفنس آفیسر سحرش ارشاد نے ملاقات کی۔ ملاقات کے دوران ضلع میں تعلیمی سرگرمیوں کے فروغ، سکولوں میں تعلیمی معیار کی بہتری اور سول ڈیفنس سے متعلق امور پر تفصیلی گفتگو کی گئی۔ڈپٹی کمشنر آصف علی ڈوگر نے کہا کہ وزیراعلیٰ پنجاب مریم نواز شریف صوبہ بھر میں تعلیم کے فروغ اور بچوں کو معیاری تعلیمی سہولیات کی فراہمی کے لیے اقدامات کر رہی ہیں، اس لیے ضلع لیہ میں بھی ان اقدامات کے مثبت نتائج کے لیے مؤثر نگرانی ضروری ہے۔انہوں نے چیف ایگزیکٹو آفیسر تعلیم عبدالحفیظ کو ہدایت کی کہ سکولوں میں تدریسی عمل، طلبہ کی انرولمنٹ، حاضری اور تعلیمی سرگرمیوں پر بھرپور توجہ دی جائے جبکہ بچوں کو بہتر اور سازگار تعلیمی ماحول کی فراہمی کے لیے تمام دستیاب وسائل بروئے کار لائے جائیں۔ انہوں نے سرکاری سکولوں میں تعلیم کے معیار کو مزید بہتر بنانے اور بچوں کے داخلے و تسلسل کے ساتھ حاضری پر خصوصی توجہ دینے کی ہدایت بھی کی۔ڈپٹی کمشنر نے سول ڈیفنس آفیسر سحرش ارشاد کو ہدایت کی کہ ضلع بھر میں سول ڈیفنس سے متعلق ذمہ داریاں مؤثر انداز میں انجام دی جائیں اور شہریوں کی جان و مال کے تحفظ کے لیے حفاظتی اقدامات پر خصوصی توجہ دی جائے۔انہوں نے غیر معیاری ایل پی جی کے استعمال اور غیر محفوظ تنصیبات کی روک تھام کے لیے باقاعدگی سے معائنہ کرنے، حفاظتی اصولوں کی خلاف ورزی پر قانون کے مطابق کارروائی کرنے اور متعلقہ اداروں کے ساتھ مؤثر رابطہ رکھنے کی ہدایت کی۔ ڈپٹی کمشنر نے سول ڈیفنس کے دائرہ کار میں آنے والے دیگر حفاظتی امور کی بھی باقاعدگی سے نگرانی یقینی بنانے پر زور دیا۔
