لیہ: محکمہ تعلیم لیہ کے زیر اہتمام سلام ٹیچر ڈے کے حوالے سے پرفارمنس ایکسیلینس ایوارڈ تقریب بہادر ڈیجیٹل لائبریری کے آڈیٹوریم میں منعقد ہوئی، جس میں ضلع بھر کے 55 نمایاں کارکردگی کا مظاہرہ کرنے والے اساتذہ کو ہیرو ٹیچر ایوارڈز اور اعزازی سرٹیفکیٹس سے نوازا گیا۔ تقریب کے مہمان خصوصی ایڈیشنل ڈپٹی کمشنر سوشل سروسز خضر ظہور تھے، جبکہ چیف ایگزیکٹو آفیسر تعلیم عبدالحفیظ، ڈسٹرکٹ ایجوکیشن آفیسرز گل شیر، میڈم رخسانہ، طارق جاوید، اے ای اوز، سکول سربراہان اور اساتذہ نے شرکت کی۔ تقریب کی میزبانی کے فرائض ارشاد کھوکھر نے انجام دیے۔ایڈیشنل ڈپٹی کمشنر سوشل سروسز خضر ظہور نے خطاب کرتے ہوئے کہا کہ استاد کسی بھی معاشرے کی فکری اور اخلاقی بنیاد مضبوط بنانے میں بنیادی کردار ادا کرتا ہے۔ اساتذہ اپنے علم، تجربے اور کردار کے ذریعے نئی نسل کی صلاحیتوں کو نکھارنے اور انہیں ذمہ دار شہری بنانے میں اہم کردار ادا کر رہے ہیں۔ انہوں نے ایوارڈ حاصل کرنے والے اساتذہ کو مبارکباد بھی پیش کی۔چیف ایگزیکٹو آفیسر تعلیم عبدالحفیظ نے کہا کہ بہترین کارکردگی کا مظاہرہ کرنے والے اساتذہ کی حوصلہ افزائی ایک مثبت روایت ہے۔ حکومت پنجاب کا مقصد اساتذہ کو سازگار تعلیمی ماحول فراہم کرتے ہوئے جدید تقاضوں سے ہم آہنگ معیاری تعلیم کو فروغ دینا ہے۔ ڈسٹرکٹ ایجوکیشن آفیسر گل شیر نے کہا کہ اساتذہ تعلیم کے ساتھ ساتھ طلبہ کی شخصیت سازی اور اخلاقی تربیت میں بھی اہم ذمہ داری ادا کر رہے ہیں، جبکہ بہترین کارکردگی کا اعتراف تعلیمی شعبے میں مزید بہتری کی راہ ہموار کرتا ہے۔ تقریب کے اختتام پر نمایاں کارکردگی کا مظاہرہ کرنے والے 15 پرائمری، 15 ایلیمنٹری اور 23 سیکنڈری اساتذہ میں ہیرو ٹیچر ایوارڈز اور اعزازی سرٹیفکیٹس تقسیم کیے گئے۔
