لیہ: ضلع لیہ میں پہلی بار منعقد ہونے والے ایم ڈی کیٹ ٹیسٹ کے انتظامات کا جائزہ لینے کے لیے ڈپٹی کمشنر آصف علی ڈوگر نے یونیورسٹی آف لیہ حافظ آباد کیمپس کا دورہ کیا۔اس موقع پر ڈسٹرکٹ پولیس آفیسر حسن جاوید بھٹی، وائس چانسلر یونیورسٹی آف لیہ پروفیسر ڈاکٹر محمد زبیر ابوبکر، ڈپٹی ڈائریکٹر کالجز ذوالفقار علی حیدری، سی ای او تعلیم ڈاکٹر محمد قیوم، ڈسٹرکٹ ایمرجنسی آفیسر ریسکیو ڈاکٹر سجاد احمد، ڈی ای او تعلیم گل شیر اور دیگر متعلقہ افسران موجود تھے۔ڈپٹی کمشنر نے ایم ڈی کیٹ ٹیسٹ کے لیے قائم گرلز اور بوائز کے علیحدہ امتحانی ہالز، امیدواروں کی آمد و داخلے کے انتظامات، ڈیوٹی پر مامور عملے کی تربیت، موبائل فون کلیکشن، بائیومیٹرک تصدیق، جیمرز، سکیورٹی، ریسکیو اور محکمہ صحت کے کاؤنٹرز سمیت دیگر انتظامات کا معائنہ کیا۔انہوں نے ممکنہ ہنگامی صورتحال سے نمٹنے کے لیے متعلقہ اداروں کی جانب سے کیے گئے پیشگی انتظامات کا جائزہ لیا جبکہ علامتی موک ایکسرسائز کے حوالے سے مختلف محکموں کی تیاری اور ذمہ داریوں کو بھی چیک کیا۔ڈپٹی کمشنر آصف علی ڈوگر نے ہدایت کی کہ ایم ڈی کیٹ ٹیسٹ کے دوران تمام متعلقہ ادارے باہمی رابطے کے ساتھ اپنی ذمہ داریاں انجام دیں اور کسی بھی ممکنہ ہنگامی صورتحال سے نمٹنے کے لیے تمام ضروری انتظامات مکمل رکھے جائیں۔ انہوں نے کہا کہ امیدواروں کو محفوظ، پرسکون اور سازگار ماحول کی فراہمی کے لیے بجلی، پینے کے پانی، طبی سہولیات اور دیگر انتظامات میں کسی قسم کی کمی نہیں ہونی چاہیے۔ڈی پی او حسن جاوید بھٹی نے بتایا کہ ایم ڈی کیٹ ٹیسٹ کے موقع پر امتحانی مرکز اور اس کے اطراف فول پروف سکیورٹی، امیدواروں کی چیکنگ، پولیس نفری کی تعیناتی، ٹریفک مینجمنٹ اور پارکنگ کے لیے خصوصی انتظامات کیے گئے ہیں۔ کسی بھی ہنگامی صورتحال میں فوری کارروائی کے لیے پولیس دیگر متعلقہ اداروں کے ساتھ مکمل رابطے میں رہے گی۔
