لیہ:کمشنر ڈیرہ غازی خان ڈویژن اشفاق احمد چوہدری نے کہا ہے کہ ضلع لیہ میں پہلی بار منعقد ہونے والے ایم ڈی کیٹ ٹیسٹ کے شفاف انعقاد کو یقینی بنانے کے ساتھ طلبہ، والدین اور گارڈینز کے لیے مثالی انتظامات کیے جائیں۔
انہوں نے یہ ہدایت ڈی سی کمیٹی روم میں ایم ڈی کیٹ ٹیسٹ کے انتظامات کے جائزہ اجلاس کی صدارت کرتے ہوئے کی۔ اجلاس میں ریجنل پولیس آفیسر اظہر اکرم، ڈپٹی کمشنر آصف علی ڈوگر، ڈی پی او حسن جاوید اور دیگر متعلقہ افسران نے شرکت کی۔
کمشنر نے کہا کہ ٹیسٹ سینٹر میں پارکنگ، طلبہ کے لیے ضروری سہولیات جبکہ والدین اور گارڈینز کے لیے سٹنگ ایریا، پینے کے پانی اور بیٹھنے کے مناسب انتظامات یقینی بنائے جائیں۔ انہوں نے کہا کہ ضلع لیہ میں ایم ڈی کیٹ ٹیسٹ سینٹر کا قیام خوش آئند ہے جس سے مقامی طلبہ کو دور دراز ٹیسٹ سینٹرز پر جانے کی سفری مشکلات سے نجات ملے گی۔
انہوں نے واضح کیا کہ ٹیسٹ کے شفاف انعقاد پر کسی صورت سمجھوتہ نہیں کیا جائے گا۔
آر پی او اظہر اکرم نے کہا کہ ایم ڈی کیٹ ٹیسٹ کے موقع پر سکیورٹی اور ٹریفک کے فول پروف انتظامات کیے جائیں گے۔ امتحانی مرکز میں چیکنگ کے لیے فی میل پولیس اہلکاروں کی ڈیوٹی بھی لگائی جائے گی۔ انہوں نے ٹیسٹ سے قبل سرچ اینڈ سویپنگ، واک تھرو گیٹس، جیمرز کی تنصیب اور سی سی ٹی وی کیمروں کو سیف سٹی کنٹرول روم سے منسلک کرنے کی ہدایت کی۔
اجلاس میں بتایا گیا کہ ایم ڈی کیٹ ٹیسٹ 20 ستمبر کو یونیورسٹی آف لیہ حافظ آباد کیمپس میں منعقد ہوگا، جس میں 1598 امیدوار حصہ لیں گے۔
بعد ازاں کمشنر اشفاق احمد چوہدری اور آر پی او اظہر اکرم نے یونیورسٹی آف لیہ حافظ آباد کیمپس کا دورہ کرکے پارکنگ ایریا، ٹریفک پلان، امتحانی ہال، سی سی ٹی وی کیمروں اور کنٹرول روم سمیت دیگر انتظامات کا جائزہ لیا۔
