لَیَّہ(نمائندہ لیہ ٹی وی ) ایرانی چوک، موضع جھکڑ پکا، بستی بھڈا موہانہ کے قریب دریائے سندھ میں دو کمسن بچے ڈوب گئے، ریسکیو 1122 کی واٹر ریسکیو ٹیم نے بچوں کی تلاش کے لیے سرچ آپریشن شروع کر دیا۔
ریسکیو 1122 کے مطابق 9 سالہ وقاص ولد ذوالفقار اور 11 سالہ ارسلان ولد خضر اپنے والد کے ہمراہ چاول کی فصل پر گئے تھے، والد نماز کی ادائیگی کے لیے گئے تو واپسی پر دونوں بچے موقع پر موجود نہ تھے۔ اطلاع ملنے پر ریسکیو 1122 کی ایمبولینس اور واٹر ریسکیو ٹیم کشتی سمیت جائے حادثہ پر روانہ کی گئی۔
ریسکیو ایمبولینس 24 منٹ 17 سیکنڈ میں موقع پر پہنچ گئی، جبکہ واٹر ریسکیو ٹیم نے دریائے سندھ میں سرچ آپریشن شروع کر دیا۔ اندھیرا ہونے کے باعث آپریشن عارضی طور پر روک دیا گیا تھا، تاہم دوسرے روز دوبارہ سرچ آپریشن جاری ہے۔
ریسکیو حکام کے مطابق دریائے سندھ میں پانی کی گہرائی تقریباً 20 فٹ اور چوڑائی 120 فٹ ہے، جبکہ 9 اہلکار سرچ آپریشن میں حصہ لے رہے ہیں۔ آپریشن ڈسٹرکٹ ایمرجنسی آفیسر ڈاکٹر سجاد احمد ملک کی نگرانی میں جاری ہے۔
