لیہ: وزیراعلیٰ پنجاب مریم نواز شریف کی ہدایت پر عوام کے حقوق کے تحفظ، معیاری خدمات کی فراہمی اور پٹرولیم مصنوعات کی درست پیمائش کو یقینی بنانے کے لیے ضلع بھر میں پٹرول پمپس کی باقاعدہ انسپکشن جاری ہے۔
اسی سلسلے میں ڈسٹرکٹ آفیسر انڈسٹریز لیہ عاشق حسین احمدانی نے اسسٹنٹ انسپکٹر اوزان و پیمانہ جات محمد عمران تھند کے ہمراہ ضلع کے مختلف پٹرول پمپس کا معائنہ کیا۔ انسپکشن کے دوران اوزان و پیمانہ جات کی جانچ پڑتال کی گئی، جبکہ کم پیمائش ثابت ہونے پر متعلقہ پٹرول پمپس کے پیمانے سیل کر دیے گئے اور ذمہ داران کے خلاف قواعد و ضوابط کے مطابق جرمانے عائد کیے گئے۔
اس موقع پر پٹرول پمپ مالکان کو ہدایت کی گئی کہ وہ اوزان و پیمانہ جات ہر وقت درست حالت میں رکھیں تاکہ شہریوں کو مقررہ مقدار کے مطابق پٹرولیم مصنوعات فراہم کی جا سکیں اور صارفین کے حقوق کا مکمل تحفظ یقینی بنایا جا سکے۔
ڈسٹرکٹ آفیسر انڈسٹریز عاشق حسین احمدانی نے کہا کہ ضلع بھر میں پٹرول پمپس کی اوزان و پیمانہ جات کے حوالے سے سخت نگرانی جاری رہے گی اور کم پیمائش یا کسی بھی قسم کی بے ضابطگی کے مرتکب افراد کے خلاف بلاامتیاز قانونی کارروائی عمل میں لائی جائے گی۔
