لَیَّہ: ڈسٹرکٹ پبلک سکول لَیَّہ میں معیارِ تعلیم کو مزید بہتر بنانے کے لیے اصلاحاتی اقدامات پر عملدرآمد شروع کر دیا گیا ہے۔ طلبہ کو معیاری تعلیم، بہترین تربیت اور کردار سازی کی سہولیات فراہم کرنے کے لیے ڈی پی ایس اسیسمنٹ کمیٹی کی سفارشات پر عمل کیا جا رہا ہے۔
اسیسمنٹ کمیٹی کی جانب سے ضلع کے تمام 6 ڈسٹرکٹ پبلک سکولوں میں ٹریننگ اینڈ اسیسمنٹ ورکشاپس کا انعقاد کیا گیا، جس میں ماہر تعلیم ٹرینرز نے اساتذہ کو جدید تدریسی تقاضوں، مؤثر تدریسی حکمت عملیوں اور طلبہ کی بہتر رہنمائی سے متعلق تربیت فراہم کی۔ اس دوران اساتذہ کی کارکردگی اور تدریسی استعداد کا بھی جائزہ لیا گیا۔
اسیسمنٹ رپورٹس اور تربیتی نتائج کی روشنی میں ڈسٹرکٹ پبلک بوائز سکول لَیَّہ کے چار اساتذہ مطلوبہ تدریسی معیار پر پورا نہ اترنے کے باعث ان کی مزید خدمات حاصل نہ کرنے کا فیصلہ کیا گیا ہے، جس کے باقاعدہ احکامات جاری کر دیے گئے ہیں۔
دوسری جانب اسیسمنٹ کمیٹی نے بہترین کارکردگی کا مظاہرہ کرنے والے 13 اساتذہ کو تعریفی اسناد دینے کی سفارش کی ہے۔ انتظامیہ کے مطابق اساتذہ کی کارکردگی کا جائزہ لینے کا عمل آئندہ بھی جاری رہے گا، جبکہ جدید تعلیمی تقاضوں سے ہم آہنگی کے لیے ریفریشر کورسز، تربیتی ورکشاپس اور پیشہ ورانہ صلاحیتوں میں اضافے کے پروگرام باقاعدگی سے منعقد کیے جائیں گے۔
