لیہ :ڈپٹی ڈائریکٹر انفارمیشن لیہ نثار احمد خان سے معروف شاعر عباس واصفی نے ملاقات کی اور سرائیکی شاعری پر مبنی اپنی نئی کتاب پیش کی۔اس موقع پر ڈپٹی ڈائریکٹر انفارمیشن نثار احمد خان نے کہا کہ شاعر اور مصنف کسی بھی معاشرے کا قیمتی اثاثہ ہوتے ہیں جو اپنی تخلیقات کے ذریعے زبان، ادب اور ثقافت کے فروغ کے ساتھ ساتھ معاشرتی شعور کو بھی اجاگر کرتے ہیں۔ انہوں نے کہا کہ اہلِ قلم اپنی فکری کاوشوں سے نئی نسل میں مثبت سوچ، برداشت، اخلاقی اقدار اور مطالعہ کے رجحان کو فروغ دینے میں اہم کردار ادا کرتے ہیں۔انہوں نے کہا کہ حکومت پنجاب ادب، زبان اور ثقافتی ورثے کے فروغ کے لیے مختلف اقدامات کر رہی ہے اور ادبی سرگرمیوں کی سرپرستی کے ذریعے اہلِ قلم کی حوصلہ افزائی کی جا رہی ہے۔ نثار احمد خان نے مزید بتایا کہ محکمہ تعلقاتِ عامہ حکومت پنجاب رائٹر ویلفیئر فنڈ کے تحت مصنفین اور ادیبوں کی مالی معاونت کے لیے مؤثر اقدامات کر رہا ہے تاکہ وہ یکسوئی کے ساتھ اپنی علمی و ادبی خدمات جاری رکھ سکیں۔انہوں نے عباس واصفی کی ادبی خدمات کو سراہتے ہوئے کہا کہ سرائیکی شاعری پر مبنی ان کی نئی کتاب سرائیکی ادب میں ایک قابلِ قدر اضافہ ثابت ہوگی اور ادبی حلقوں میں اسے بھرپور پذیرائی حاصل ہوگی۔
