لیہ :ڈسٹرکٹ پولیس آفیسر لیہ حسن جاوید بھٹی کی ہدایات پر ضلع بھر میں نمازِ جمعہ کے بعد کھلی کچہریوں کا انعقاد کیا گیا، جہاں ایس پی انویسٹی گیشن، تمام ایس ڈی پی اوز اور ایس ایچ اوز نے شہریوں کے مسائل سنے اور ان کے حل کے لیے ضروری اقدامات کیے۔کھلی کچہریوں کے دوران والدین کو بچوں کی مؤثر نگرانی، اچھے اور برے لمس کی پہچان اور بچوں کو جنسی استحصال سے محفوظ رکھنے کے حوالے سے آگاہی فراہم کی گئی۔ خواتین اور بچوں کو جنسی جرائم سے تحفظ، انسدادِ زیادتی ایکٹ اور کم عمری کی شادی کی روک تھام سے متعلق قوانین پر بھی بریفنگ دی گئی۔پولیس افسران نے شہریوں کو ٹریفک قوانین کی پابندی، محفوظ ڈرائیونگ اور حادثات سے بچاؤ کے لیے احتیاطی تدابیر اختیار کرنے کی ہدایت کی۔ اس کے علاوہ جرائم کی روک تھام اور امن و امان کے قیام کے لیے ٹھیکری پہرہ فعال بنانے اور عوامی تعاون کو فروغ دینے پر زور دیا گیا۔شہریوں کو مشکوک سرگرمیوں کی بروقت اطلاع پولیس کو دینے اور جان و مال کے تحفظ کے لیے پولیس سے تعاون کی اہمیت سے بھی آگاہ کیا گیا۔ لیہ پولیس کے مطابق جرائم کے خاتمے، امن و امان کے قیام اور شہریوں کو بروقت انصاف کی فراہمی کے لیے اقدامات جاری ہیں۔
