لیہ : لیہ فٹبال لیگ میں گزشتہ روز کھیلے گئے تین میچوں کے نتائج جاری کر دیے گئے۔ پہلے میچ میں آزاد فٹبال کلب لیہ نے تاندلیانوالہ فٹبال کمیٹی فیصل آباد کو پنلٹی ککس پر شکست دے دی۔ دوسرے میچ میں ڈی ایف اے سرگودھا نے بلوچ فٹبال کلب لیہ کو دو صفر سے ہرا کر کامیابی حاصل کی، جبکہ تیسرے میچ میں ڈیرا الیون فٹبال کلب ڈی آئی خان نے جانباز فٹبال کلب بلوچستان کو پنلٹی ککس پر شکست دے کر فتح اپنے نام کر لی۔
ڈپٹی کمشنر آصف علی ڈوگر نے لیگ کے میچز دیکھے، کھلاڑیوں کی حوصلہ افزائی کی اور کامیاب ٹیموں کے کھلاڑیوں میں انعامات تقسیم کیے۔ اس موقع پر انہوں نے کہا کہ لیہ فٹبال لیگ نوجوان کھلاڑیوں کو اپنی صلاحیتوں کے اظہار کے مواقع فراہم کرنے کے ساتھ کھیلوں کے فروغ اور صحت مند سرگرمیوں کے لیے اہم کردار ادا کر رہی ہے۔ مختلف شہروں اور صوبوں سے ٹیموں کی شرکت بین الصوبائی ہم آہنگی، بھائی چارے اور قومی یکجہتی کو مضبوط بنانے کا ذریعہ ہے۔
اس موقع پر ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنر لیہ رانا زوہیب کریم، ڈویژنل سپورٹس آفیسر ڈاکٹر فیصل امیر خان، ڈسٹرکٹ سپورٹس آفیسر امتیاز احمد بھٹی، انٹرنیشنل فٹبالر عارف چھینہ، صدر ڈسٹرکٹ پریس کلب محسن عدیل چوہدری، صدر پریس کلب کوٹ سلطان اظہر بھٹی اور دیگر شخصیات بھی موجود تھیں۔
لیہ فٹبال لیگ میں ملک بھر سے شریک ٹیموں کے درمیان مقابلوں کا سلسلہ جاری ہے۔ ایونٹ مختلف علاقوں کے کھلاڑیوں کو ایک دوسرے کے قریب لانے اور دوستانہ روابط مضبوط کرنے کا بھی ذریعہ بن رہا ہے۔
