لیہ: لیہ فٹبال لیگ میں گزشتہ روز کھیلے گئے چاروں میچوں کے نتائج جاری کر دیے گئے۔ ڈپٹی کمشنر آصف علی ڈوگر اور سابق صوبائی وزیر مہر اعجاز احمد اچلانہ نے لیہ فٹبال لیگ میں شرکت کی۔انہوں نے میچز دیکھے اور کھلاڑیوں کی حوصلہ افزائی کی۔ اس موقع پر کامیاب ٹیموں کے کھلاڑیوں میں انعامات بھی تقسیم کیے گئے۔پہلے میچ میں فتح پور فٹبال اکیڈمی نے یونیورسٹی آف لیہ کو ایک صفر سے شکست دی۔ دوسرے میچ میں حسین ہوم ٹیکسٹائل ملز ملتان نے فخرِ مروت فٹبال کلب لکی مروت کو مقررہ وقت میں مقابلہ بغیر کسی گول کے برابر رہنے کے بعد پنلٹی شوٹ آؤٹ پر شکست دے دی۔ تیسرے میچ میں بلوچستان کے جانباز فٹبال کلب نے ڈی ایف اے ملتان کو ایک صفر سے ہرا کر کامیابی حاصل کی جبکہ چوتھے اور آخری میچ میں باچا خان فٹبال کلب ژوب نے زینتھ فٹبال کلب لیہ کو پنلٹی شوٹ آؤٹ پر شکست دے دی۔اس موقع پرمہر طفیل لوہانچ، فاروق خان کھتران نمائندہ پیٹرول پمپ ایسوسی ایشن، انجینئر ندیم مشتاق، نور خان بھٹہ ایسوسی ایشن، پروفیسر یاسر فرحان چاند اور میڈیا نمائندگان بھی موجود تھے۔اس موقع پر ڈپٹی کمشنر آصف علی ڈوگر نے کہا کہ لیہ فٹبال لیگ نوجوان کھلاڑیوں کو اپنی صلاحیتوں کے اظہار کے مواقع فراہم کر رہی ہے ملک کے مختلف علاقوں سے ٹیموں کی شرکت کھیلوں کے فروغ کے ساتھ بین الصوبائی ہم آہنگی، بھائی چارے اور قومی یکجہتی کو مضبوط بنانے میں اہم کردار ادا کر رہی ہےضلعی انتظامیہ کھیلوں کے مقابلوں کے لیے بہتر سہولیات فراہم کرنے اور کھلاڑیوں کی حوصلہ افزائی کے لیے کوشاں ہے۔
