ڈی پی او لَیّہ حسن جاوید بھٹی کی کھلی کچہری، شہریوں کے مسائل ترجیحی بنیادوں پر حل کرنے کی ہدایت “انصاف ہر شہری کا حق ہے”، مرد و خواتین سائلین کی درخواستوں پر فوری کارروائی کیلئے متعلقہ افسران کو احکامات جاری

لَیّہ (نمائندہ لَیّہ ٹی وی) پنجاب حکومت کے وژن “انصاف ہر شہری کا حق” پر عملدرآمد کرتے ہوئے ڈسٹرکٹ پولیس آفیسر لَیّہ حسن جاوید بھٹی کی جانب سے روزانہ کی بنیاد پر دفتر پولیس میں کھلی کچہری کا انعقاد کیا جا رہا ہے، جہاں شہریوں کے مسائل سنے جا رہے ہیں اور ان کے فوری حل کیلئے متعلقہ افسران کو موقع پر ہدایات جاری کی جا رہی ہیں۔کھلی کچہری کے دوران ضلع بھر سے آنے والے مرد و خواتین سائلین نے اپنے انفرادی اور اجتماعی مسائل سے متعلق درخواستیں ڈی پی او لَیّہ کو پیش کیں۔ حسن جاوید بھٹی نے شہریوں کی درخواستوں کو توجہ سے سنا اور مختلف نوعیت کے معاملات پر متعلقہ پولیس افسران کو شفاف اور میرٹ پر کارروائی یقینی بنانے کی ہدایات جاری کیں۔اس موقع پر ڈی پی او لَیّہ حسن جاوید بھٹی کا کہنا تھا کہ شہریوں کو بروقت انصاف اور ریلیف کی فراہمی پنجاب پولیس کی اولین ترجیح ہے۔ انہوں نے کہا کہ موصول ہونے والی درخواستوں پر باقاعدگی سے کارروائی عمل میں لائی جا رہی ہے اور کوشش کی جا رہی ہے کہ تمام معاملات کو حقائق اور میرٹ کی بنیاد پر جلد از جلد یکسو کیا جائے تاکہ شہریوں کا اعتماد بحال رہے۔ڈی پی او نے مزید کہا کہ کھلی کچہری کا مقصد شہریوں اور پولیس کے درمیان فاصلے کم کرنا اور عوامی مسائل کو براہ راست سن کر ان کا فوری حل ممکن بنانا ہے۔ انہوں نے متعلقہ افسران کو ہدایت کی کہ شہریوں کے ساتھ خوش اخلاقی سے پیش آیا جائے اور انصاف کی فراہمی میں کسی قسم کی غفلت برداشت نہیں کی جائے گی۔