لیہ(نمائندہ لیہ ٹی وی )عید قرباں کے سلسلہ میں ضلعی انتظامیہ کے انتظامات جاری، مویشی سیل پوائنٹس قائم کر دئے گئے۔ ڈپٹی کمشنر آصف علی ڈوگر کی ہدایت پر عید قرباں کے سلسلے میں ضلعی انتظامیہ کی جانب سے مویشیوں کی خرید و فروخت کے لیے مختلف مقامات پر سیل پوائنٹس قائم کر دیے گئے ہیں۔ اس سلسلے میں ایڈیشنل ڈپٹی کمشنر جنرل شبیر احمد ڈوگر نے بائی پاس روڈ پر لیہ مائنر کے قریب بدھ منڈی میں قائم سیل پوائنٹ کا دورہ کیا اور انتظامات کا تفصیلی جائزہ لیا۔ متعلقہ محکموں کے افسران بھی ان کے ہمراہ تھے۔ اے ڈی سی جی نے موقع پر بیوپاریوں اور شہریوں کے لیے فراہم کی گئی سہولیات کا معائنہ کرتے ہوئے سایہ دار جگہ، پینے کے صاف پانی، بیٹھنے کے انتظامات سمیت لائیو سٹاک، پولیس، ریسکیو اور دیگر متعلقہ اداروں کے قائم کیمپوں کا جائزہ لیا۔ انہوں نے متعلقہ حکام کو ہدایت کی کہ سیل پوائنٹس پر صفائی ستھرائی کے بہترین انتظامات یقینی بنائے جائیں، جانوروں کو چیچڑ مار سپرے کیا جائے جبکہ بیوپاریوں اور خریداروں کو ہر ممکن سہولت فراہم کی جائے تاکہ شہریوں کو عید قرباں کے موقع پر کسی قسم کی دشواری کا سامنا نہ کرنا پڑے۔
