لیہ میں نئی صنعتوں کے قیام اور کاروباری سرگرمیوں کے فروغ کے وسیع مواقع موجود ہیں، ڈپٹی کمشنر آصف علی ڈوگر

لیہ: ڈپٹی کمشنر آصف علی ڈوگر سے چیمبر آف کامرس کے وفد نے ملاقات کی، جس میں ضلع لیہ میں تجارتی، کاروباری اور معاشی سرگرمیوں کے فروغ اور چیمبر آف کامرس کی عمارت کی تعمیر کے حوالے سے تفصیلی تبادلہ خیال کیا گیا۔
ملاقات میں ایڈیشنل ڈپٹی کمشنر ہیڈ کوارٹر اویس سرور، صدر چیمبر آف کامرس عدنان نہرا، سینئر نائب صدر طاہر خان، خواتین چیمبر آف کامرس لیہ کی نائب صدر رمشا کنول، کنوینر انٹرپرینیورشپ کمیٹی ایمن نذیر، ایگزیکٹو ممبر غلام کبریٰ اور صدر انجمن تاجران اظہر ہانس بھی موجود تھے۔
اس موقع پر ڈپٹی کمشنر آصف علی ڈوگر نے کہا کہ ضلع لیہ جنوبی پنجاب کے اہم اضلاع میں شمار ہوتا ہے، جہاں تجارتی و کاروباری سرگرمیوں کے فروغ اور نئی صنعتوں کے قیام کے وسیع مواقع موجود ہیں۔ چیمبر آف کامرس اور تاجر برادری ان مواقع سے فائدہ اٹھاتے ہوئے کاروباری سرگرمیوں کو وسعت دیں اور نئی صنعتوں کے قیام کے لیے عملی اقدامات کریں۔
انہوں نے کہا کہ ضلعی انتظامیہ کاروباری برادری کو سہولیات کی فراہمی کے لیے پُرعزم ہے۔ نئے کاروبار کے قیام اور تجارتی سرگرمیوں کے فروغ کے لیے این او سی، پرمٹ اور لائسنس کے اجرا سمیت قانونی تقاضے پورے کرنے کے عمل میں ہر ممکن آسانی اور معاونت فراہم کی جائے گی۔
ڈپٹی کمشنر نے کہا کہ نئی صنعتوں کے قیام اور کاروباری سرگرمیوں میں اضافے سے روزگار کے نئے مواقع پیدا ہوں گے، مقامی معیشت مضبوط ہوگی اور علاقے میں معاشی خوشحالی آئے گی۔ حکومت اور کاروباری برادری کے باہمی تعاون سے ضلع لیہ ترقی کی نئی منازل طے کرے گا۔
چیمبر آف کامرس کی عمارت کی تعمیر کے حوالے سے ڈپٹی کمشنر نے کہا کہ ضلعی انتظامیہ باہمی مشاورت سے اس مقصد کے لیے جلد بھرپور اقدامات اٹھائے گی، تاکہ کاروباری برادری کو ایک مؤثر پلیٹ فارم میسر آسکے اور تجارتی سرگرمیوں کے فروغ میں مزید مدد ملے۔