جون میں بجلی کی قیمت میں کوئی اضافہ نہیں ہوگا، پاور ڈویژن کی صارفین کو بڑی خوشخبری بروقت اقدامات سے صارفین 38 ارب روپے کے اضافی بوجھ سے بچ گئے، 5 سے 6 روپے فی یونٹ اضافے کا امکان ختم

اسلام آباد(نمائندہ لیہ ٹی وی) پاور ڈویژن نے بجلی صارفین کیلئے بڑی خوشخبری سناتے ہوئے اعلان کیا ہے کہ جون کے مہینے میں بجلی کی قیمت میں کوئی اضافہ نہیں کیا جائے گا۔ترجمان پاور ڈویژن کے مطابق بروقت اور مؤثر اقدامات کے باعث صارفین کو ماہانہ فیول ایڈجسٹمنٹ کی مد میں 5 سے 6 روپے فی یونٹ اضافی بوجھ سے بچا لیا گیا ہے۔ ترجمان نے بتایا کہ ایل این جی کی بندش اور مہنگے فرنس آئل کے استعمال کے باوجود بجلی صارفین پر کوئی اضافی مالی بوجھ منتقل نہیں کیا جائے گا۔پاور ڈویژن کے ترجمان کا کہنا تھا کہ حکومتی حکمت عملی کے نتیجے میں صارفین کو ممکنہ طور پر 38 ارب روپے کے اضافی اخراجات سے بچایا گیا ہے جبکہ ماہانہ فیول ایڈجسٹمنٹ کو 1.73 روپے فی یونٹ اضافے پر روک دیا گیا ہے۔انہوں نے کہا کہ حکومت عوام کو ریلیف فراہم کرنے کیلئے توانائی کے شعبے میں مسلسل اقدامات کر رہی ہے تاکہ مہنگائی کے موجودہ حالات میں صارفین پر اضافی بوجھ نہ پڑے۔